කොළඹ විශ්වවිද්‍යාලයේ උපාධි ප්‍රධානෝත්සවයේදී සරසවි සිසුන් වත්මන් කුලපති පූජ්‍ය මුරුත්තෙට්ටුවේ ආනන්ද හිමියන් අතින් උපාධි සම්මාන ලබා ගැනීම ප්‍රතික්ෂේප කොට ඇති බව වාර්තා වෙනවා.
කුලපතිහිමිගේ පත්වීම දේශපාලන පත්වීමක් බව කියමින් සිසුන් ආනන්ද හිමි අතින් උපාධිය ලබා ගැනීම ප්‍රතික්ශේප කරමින් සම්මාන සහතික උපකුලපතිවරයාගේ අතින් ලබා ගෙන තිබෙනවා.
එසේම විශ්ව විද්‍යාල ආරංචිමාර්ග පවසන පරිදි උපාධි උළෙලට පැමිණි ඇතැම් සිසුන් සම්පූර්ණයෙන්ම කලු වර්ණයෙන් සැරසී විරෝධය ඵල කර තිබෙනවා.
එමෙන්ම එම විරෝධය සම්බන්ධයෙන් මේ වන විට සමාජ මාධ්‍ය ඔස්සේ කතාබහක්ද නිර්මාණය වී තිබෙනවා.
එවන් වටපිටාවක උපාධීප්‍රතිලාභී විද්වතුන් ගන්නා ලද පියවර අතිශයින්ම ආදර්ශවත් ශ්‍රේෂ්ඨ ක්‍රියාවක් බව දක්ෂිණ ලංකාවේ ප්‍රධාන සංඝණායක ආචාර්යය ඕමල්පේ සෝභිත හිමි සඳහන් කරනවා.
උන් වහන්සේ මෙම අදහස් ප්‍රකාශ කර සිටියේ ඇඹිලිපිටිය ශ්‍රී බෝධිරාජ ධර්මායතනයේදී මාධ්‍ය හමුවක් කැදවමින්.
වැඩිදුරටත් අදහස් දැක්වූ ආචාර්ය ඕමල්පේ සෝභිත හිමියන්,
"තමන් අතමැති දෙයක් සාධාරණ ලෙස ධර්මානුකූලව ප්‍රතික්ෂේප කිරීමේ වැඩපිළිවෙළ ඉතාමත් සාර්ථකව සිදු වුන බව අපි දැක්කා. කරුණාකර මේ පිණිවිඩය මේ ආදර්ශය මේ නිදර්ශණය ඉගෙනගන්න. ප්‍රධාන වශයෙන් අපි කියා සිටිනවා නායක මහානායක ආගමික නායකයන් ඇතුලු සියලුම ආගමික නායක වරුන් සමාජ ක්‍රියාකාරීන් මේ නිදර්ශණය පාඩමට ගත යුතුයි. තමා අකමැති දේ අකමැති බව පැහැදිලිවම දැන දැනත් උගුරට හොරා බෙහෙත් කන ආකාරයේ දෙබිඩි, නෝන්ජල් ප්‍රතිපත්තියක් අනුගමනය කරද්දී ලෝකේ රටේ මිනිස්සු කොළඹ විශව විදියාලයේ විද්වතුන් ඝෘජුලෙස ඝෘජු ප්‍රතිපන්න ලෙස තමන්ගේ මතය පැහැදිලිවම ප්‍රකාශ කරලා තියෙනවා."
"ජනාධිපතිතුමා මේ පිණිවිඩය තේරුම්ගත යුතුයි. රජය මේ පණිවිඩය තේරුම් ගත යුතුයි. ඒ අපහාසයට උපහාසයට යොමු වුන තනතුර තමයි රජයත් නියෝජනය කරන්නේ. විශ්වවිද්‍යාලීය විද්වත් ප්‍රජාව තමයි මේ රටේ ජනතාව නියෝජනය කරන්නේ. ජනතාව රජයට දෙන පොදු දඩුවමක් තමයි මේ ප්‍රසිද්ධියට පත්වූනේ. ජනාධිපතිතුමා සිතා ගත යුතුයි තම තමන්ට අවශ්‍ය විදියට පුද්ගලික සම්බන්ධකම් දේශපාලන සම්බන්ධකම් ඥාති හිතමිත්‍රකම් මුල් කරටගන ආයතන වග අදිපතිකම් දෙනකොට, සංස්ථාවල සභාපතිකම් දෙනකොට කාටවත් මොකුත් කියාගන්න බැරිව සිටියේ. කොළඹ විශ්ව විද්‍යාලයේ විද්‍යාර්තීන් ඒ සදහා නිසි වැඩපිළිවෙළ ක්‍රියාත්මක කලා. රජය මෙය පැහැදිලිව තේරුම්ගත යුතුයි. ඒ තමන්ගේ වුවමානවන් යටතේ මේ දක්වා පත්කර ඇති සංවිධාන මණ්ඩල සංස්ථා ආදියට පත්කල නායකයින් සභාපතිවරුන් අධ්‍යක්ෂකවරුන් අතිශයින්ම අසාර්තකයි කියන එක ඉතාමත් පැහැදිලියි."
"අද මුලු රටම මහත් ව්‍යවසනයකට ගොදුරුවෙලා තියෙන්නේ ඥාති සංග්‍රහය, අපි හිතනව විද්වතුන් කියල විද්වතුන්ට අවස්ථාව දීල තියෙනව රටේ වැඩ කරන්න කියල ඒවා සම්පූර්නයෙන්ම අසාර්තක වෙලා තියෙනවා. එහෙමනම් ජනාධිපතිතුමා දැන්වත් තේරුම්ගන්න ඔබ මේ දක්වා ගෙන ගිය වැඩපිළිවෙල වැරදියි. ඒ වැරැද්ද නිවැරදි කරගන්න තවමත් අවස්ථාව නැතිවාම නොවෙයි. මේ කොළඹ විශ්ව විද්‍යාලයේ පිරිස කල ක්‍රියාව මේ රජය භාරගත යුතුයි. තේරුම් ගත යුතුයි. මේ රටේ ආගමික නායකයන් ඇතුලු සියලු නායකයන්ට කොළඹ විශ්ව විද්‍යාලයෙන් ඉතාමත් වැදගත් පාඩමක් කියලදීල තියෙනවා. ඒක ඉතාමත් වැදගත්."
"අයතා පත්වීම්, අසාධාරණ පත්වීම් තමයි රටක විනාශයට මුල වෙන්නේ. විශේෂයෙන් නිදර්ශන කිහිපයකින් මේ බව ඔප්පු වෙනවා. රජය මහජන ඡන්දයෙන් පත්වෙන බොහෝ දෙනෙකුට රජය විශේෂ වරප්‍රසාද ලබා දෙනව. සුදුසුකම නොව ඥාතිත්වය හිතවත්කම පාක්ෂික බව ජන්දයට උදව්කල බව සලකල යම් යම් ආයතනවල ප්‍රධානත්වයන් දීල තියෙනවා. අද මහා පරිමාණයෙන් මහජන දේපොල සූරා කන්නත් කොමිස් ගහන්නත් පෙළබිලා තියෙන්නේ මෙන්න මේ පත්වීම්. ඒ නිසා රජය මොන තරම් අසීරුතාවයට පත්වෙලා තියෙනවද? තමන්ගේ අය මේ වැරදි කරන නිසා තමන්ගේ කම නිසා අඩුම තරමේ නීතිමය පියවරක්වත් ගන්න බැරිවෙලා තියෙනවා. නොයෙක් විදියේ වංචා සීනි වංචා, ලූනු වංචා, තෙල් වංචා, පොහොර වංචා, ගෑස් වංචා මේ සෑම වංචාවකම හේතුව කුමක්ද? හිතවතුන්ට තැන දීම. ඔවුන් හිතනවා තමන්ට ලැබුනු මොහොතේ හොරකම් කිරීම හොදයි කියල. ඒනිසා තමයි මේ දක්වා හොරකම් මැරකම් ජාතික අපරාධ විශාල වශයෙන් වෙලා තියෙද්දී එකම පුද්ගලයෙක්වත් අත්අඩංගුවටවත් ගන්න ආත්ම ශක්තියක් නැතිවෙලා තියෙන්නේ."
"අසූචි පුරවා ගත්ත නැවක් ලංකාවට ගෙනත් බලහත්කාරයෙන් බාන්න හදන වෙලාවේ මහජනතාවගෙන් විරෝධයක් නැගුනා ඒත් අවසානයේ අසූචි නැවකට වන්දි ගෙවන්න උනා. අපරාදේ මුදලක් චීන කුණු නැවකට ගෙවන්න සුද වුනා. ජනාධිපතිතුමා මෙතෙන්දිවත් ජනතාවට යුක්තිය ඉටු කරන්න. මේ හොර ගනුදෙනුවට ඇයි මහජනතාවට දඩුවම් දෙන්නේ. මේ ගනුදෙනුවට අත්සන් කල අයගේ ධනයෙන් නේද මේ වන්දිය ගෙවන්න ඕන. දැන් තියෙන්නේ හිඟන කාසිවලින් පුරවන්න හදන භාණ්ඩාගාරයක්‍. මේ කූඨ පත්වීම් නිසා මේව වෙන්නේ. දැන්වත් මේක රජය තේරුම්ගත යුතුයි."
