අකමැත්තෙන් වුවද අවම වශයෙන් හෝ බස් ගාස්තු ඉහළ දැමීමක් සිදු කිරීමට වන බව ප්‍රවාහන රාජ්‍ය අමාත්‍ය දිලුම් අමුණුගම පවසනවා.
හාරිස්පත්තුව, අංකුඹුර නගර සංවර්ධන ව්‍යාපෘතියකට සහභාගී වු අමාත්‍යවරයා මහජන හමුව අමතමින් මෙම අදහස් පළ කළා.
මෙහිදී තවදුරටත් අදහස් පළ කරමින් අමාත්‍යවරයා මෙසේද සදහන් කළා,
"පවතින තත්ත්වය මත අකමැත්තෙන් වුවත් ඉන්ධන මිල ඉහළ දැමීමට රජයට සිද්ධ වුණා. ඉන්ධන මිල ඉහළ යාමට සමගාමීව මතුවන ප්‍රශ්නය තමයි ප්‍රවාහන ගාස්තු ඉහළ යාම. ඒ අනුව ලබන බදාදා වෙනකොට බස් ගාස්තු සංශෝධනයක් පිළිබඳ අපට තීරණයක් ගන්න වෙනවා. රටේ පවතින තත්ත්වය අනුව ප්‍රවාහන ඇමැති වශයෙන් බස් ගාස්තු වැඩි කරලා ජනතාවගෙන් කුණුහරප අහ ගන්න මම කැමැති නෑ. නමුත් සියලු දේ ඒකාබද්ධව සමබරව කළ යුතුයි. ඉන්ධන මිල ඉහළ දමලා බස් ගාස්තු පහළට දමනවා වගේ ප්‍රාතිහාර්යක් පාන්න අපට බෑ. ඒ නිසා ලබන බදාදා වන විට යම් බස් ගාස්තු සංශෝධනයකට අපට අකමැත්තෙන් වුවත් යන්න වෙනවා.
ඒ ආකාරයෙන් බස් ගාස්තු සංශෝධනයකට අපි ගියත් බස් ව්‍යාපාරය වගේම මගියා ගැන විශේෂයෙන් මහජනතාව ගැන කල්පනා කරලා යන්න පුළුවන් අවම සංශෝධනයකට අපි යනවා. හැබැයි ඒ සංශෝධනයට අපි යන්නේ ඉන්ධන මිල පහළ වැටීමක් සිදුවුණොත් හෝ ආසන ගත මගී සංඛ්‍යාව පමණක් කියලා තියෙන නීතිය ඉවත් කිරීමට සිදු වුණහොත් නැවතත් බස් ගාස්තු අඩු කරන කොන්දේසිය මත පමණක් බස් ගාස්තු වැඩිවීමක් බදාදා වන විට ලබා දෙන්නට අපි කටයුතු කරනවා. නමුත් පවතින කොවිඩ් තත්ත්වය මත ආසන ගත මගින් පමණක් රැගෙන යාමේ නීතිය ඉවත් කිරීමට අපිට උපදෙස් ලැබිලා නෑ."
