October 20, 2020

හිටපු අග්‍රාමාත්‍ය රනිල් වික්‍රමසිංහ මහතා සාක්ෂි දීම සඳහා මීට සුළු මොහොතකට පෙර පාස්කු කොමිසමට පැමිණ තිබේ.

ඊයේ දිනයේ දී හිටපු ජනාධිපති මෛත්‍රීපාල සිරිසේන මහතා පැය 07කට ආසන්න කාලයක් කොමිසම ඉදිරියේ සාක්ෂි දුන්නේය.

පාස්කු ප්‍රහාරය වළක්වා නොගැනීම සම්බන්ධයෙන් තමන් වගකීමෙන් පළා නොයන නමුත් සාමූහික වගකීමට අදාළ සියලු පාර්ශව යටත් වන බව හිටපු ආරක්ෂක ලේකම් හේමසිරි ප්‍රනාන්දු මහතා පවසයි.

ප්‍රහාරය සම්බන්ධයෙන් විමර්ශනය කරනු ලබන කොමිසම හමුවේ සාක්ෂි දෙමින් ඔහු මේ බව පැවසීය. හිටපු ආරක්ෂක ලේකම් හේමසිරි ප්‍රනාන්දු මහතා පාස්කු ප්‍රහාරය සම්බන්ධයෙන් විමර්ශනය කරනු ලබන කොමිසම හමුවේ ඊයේ (01) හත් වන දිනටත් සාක්ෂි ලබාදුන්නේය.

හිටපු ජනාධිපතිවරය සහ රාජ්‍ය බුද්ධි අධ්‍යක්ෂ හිටපු ප්‍රධානී නිලන්ත ජයවර්ධන යන මහත්වරු අතර පැවති සමීප ඇසුර නිසා ආරක්ෂක ලේකම් ලෙස තමන්ට නිලන්ත ජයවර්ධන මහතා අධීක්ෂණය කිරීමට අවස්ථාව නොලැබුණු බව හෙතෙම සඳහන් කළේය.

මෙහිදී කොමිසම හේමසිරි ප්‍රනාන්දු මහතාගෙන් විමසා සිටියේ, පාස්කු ප්‍රහාරයට පෙර ලැබුණු පූර්ව අනතුරු ඇඟවීමේ තොරතුර සම්බන්ධයෙන් ජනාධිපති මෛත්‍රීපාල සිරිසේන මහතාට දුරකථන ඇමතුමක්වත් ලබාදී දැනුම්වත් නොකිරීමට හේතුව කුමක්ද යන්නය.

ඊට පිළිතුරු ලබාදෙමින් හිටපු ආරක්ෂක ලේකම්වරයා සඳහන් කළේ,

"ඇමතුමක් ගත්තේ නැහැ ස්වාමීනි. මට ඒකට හේතුව පැහැදිලි කරන්න ඕනේ. මම ආරක්ෂක ලේකම්ධූරය භාරගෙන දින 2 කට පස්සේ ජනාධිපතිතුමාව හමුවෙන්න ගියා අත්සන් වගයක් ගන්න. ඒ වෙද්දී මට රාජ්‍ය බුද්ධි සේවයෙන් පළමුවරට බුද්ධි තොරතුරක් ලැබුණා. මම ඒ ගැන ජනාධිපතිවරයාට කිව්වා. එතකොට එතුමා මගේ දිහා කාරුණිකව බලලා 'ආ ඒක හරි. මට ඕක ගැන නිලන්ත කිව්වා කියලා," ඊට පස්සෙ තව අවස්ථාවකදී මට නිලන්ත බුද්ධි තොරතුරක් දුන්නා. ඒ ගැනත් මම ජනාධිපතිව හමුවෙලා තොරතුර ගැන කියන්න ගියාම එතකොටත් මට කිව්වා, "නිලන්ත මට ඔය ගැන කිව්වා."මම මේ ගැන නිලන්ත හමුවෙලා ඇහුවා ‘මොකක්ද නිලන්ත මේ ක්‍රමවේදය,‘ එතකොට නිලන්ත මට කිව්වා 'මම සාමාන්‍යයෙන් හැම තොරතුරක්ම ජනාධිපතිට කියනවා. ඒවගේම ආරක්ෂක ලේකම්ටත් කියනවා‘ඉතින් ස්වාමීනි මේ ප්‍රහාරය ගැන තොරතුරත් නිලන්ත ජනාධිපතිට කියන්න ඇති කියල මම හිතුවේ ඒ නිසයි." යනුවෙනි.

"ප්‍රහාරයට පස්සේ මම ලේකම් ධූරයෙන් අස්වෙනවා කියලා දැනුම්දෙන්න ජනාධිපතිතුමා හමුවෙන්න ගියා ඒ වෙලාවේ එතුමා පත්තරය බලන ගමන් හිටියේ මම ඇහුවා 'සර් නිලන්ත හැම තොරතුරක්ම කියන එකේ මේ තොරතුර දැනුම් දුන්නේ නැත්ද..?' කියලා. එතකොට ජනාධිපතිතුමා මම අහපු දේට මුකුත් නොකියා පත්තරේ බලබල හිටියා ඔන්න ඕකයි තත්ත්වේ." යනුවෙන් හේමසිරි ප්‍රනාන්දු මහතා සාක්ෂි ලබා දෙමින් සඳහන් කළේය.

අනතුරුව කොමිසමේ සභාපති විනිසුරු හේමසිරි ප්‍රනාන්දු මහතාගෙන්. "ඔබට අප්‍රේල් 20 වෙනිදා නිලන්ත තොරතුරක් දුන් අවස්ථාවේ ඇහුවෙ නැත්ද මේක ජනාධිපතිට කිව්වද කියලා?" යනුවෙන් විමසා සිටියේය.

ඊට පිළිතුරු ලබාදෙමින් හිටපු ආරක්ෂක ලේකම්වරයා, "නැහැ ස්වාමීනි. මම අහන්න ගියේ නැහැ. හිතාගෙන හිටියේ ඒක දැනුම් දෙන්න ඇති කියලා, නැත්නම් නිලන්තට තිබුණා ඒ වෙලාවෙ මට කියන්න ජනාධිපතිටත් කියන්න කියලා. අනිත් එක මේ වගේ ප්‍රශ්නයක් පිටරටක වුණානම් මෙහෙම Whatsapp Massege එවන්නේ නැහැ. බුද්ධි අංශ නිලධාරීන් ඇවිල්ලා හමුවෙලා කථා කරනවා," යනුවෙන් ප්‍රකාශ කළේය.

"අමාත්‍යාංශයේ ලේකම් ලෙස ජනාධිපතිවරයා දැනුම්වත් කිරීම ඔබේ වගකීම නේද..?" රජයේ ජ්‍යෙෂ්ඨ අතිරේක සොලිසිටර් ජෙනරාල්වරිය විමසා සිටියාය.

"ඔව් මගේ වගකීම වෙන්න පුළුවන්, ඒත් මා එක්ක තිබුණ විරසකය නිසා උනන්දුවක් දැක්වුයේ නෑ" යනුවෙන් හේමසිරි ප්‍රනාන්දු මහතා සඳහන් කළේය.

"ඔබ අවස්ථා ගණනකදී කිව්වා ඔය විරසකය ගැන. නමුත් සිංහල අවුරුද්දට ජනාධිපතිවරයාට සුබ පතන්න ඔබ දියතලාවෙ ඉදන් ආවා නේද ? බුලත් දීලා තරහ මරහා නැති කරගන්න එක සිරිතනේ. එතනදීවත් මේ විදෙස් තොරතුර ගැන කිව්වේ නැත්ද?" ජනාධිපති කොමිසමේ සභාපති විනිසුරුවරයා මෙහිදි හේමසිරි ප්‍රනාන්දු මහතාගෙන් විමසා සිටියේය.

ඊට පිළිතුරු ලබාදුන් හේමසිරි ප්‍රනාන්දු මහතා ප්‍රකාශ කළේ, "මගේ අමනාපයක් නැහැ, මම ගිහින් බුලත් අතකුත් දුන්නා. දැන් නිලන්ත ජයවර්ධන හැමතැනකම කියල තිබුණනේ 'මේක ලෙඩක්' කියලා. මටත් කිව්වා නම් ඕක ලෙඩක් කියලා, මම අඩගහලා අහනවනේ ලෙඩේට මොකක්ද කරන්නේ කියලා. මම කියන්නේ මේකට මම වගකියන්නවා නම් නිලන්ත ඒකට තුන්ගුණයක් වගකියන්න ඕනේ ජනාධිපතිවරයා දැනුවත් නොකිරීම ගැන," යනුවෙන් කියා සිටියේය.

"ඒ කියන්නේ ඔබ පිළිගන්නවාද ආරක්ෂක ලේකම් ලෙස ඔබත් වගකියන්න ඕනේ කියලා..?" යැයි රජයේ අතිරේක සොලිසිටර් ජෙනරාල්වරිය හේමසිරි ප්‍රනාන්දු මහතාගෙන් විමසීය. 

''මම කිසිලෙසකින් කියන්නේ නැහැ මට මේකට වගකීමක් නැහැ කියලා. මෙතෙන සාමූහික වගකීමක් තියෙන්නේ. මේකට අදාළ තවත් පාර්ශව ඉන්නවා. හැමදේම ආරක්ෂක ලේකම්ට කරන්න පුළුවන් නම් මේ රටට පොලිස්පතිවරයෙක්, බුද්ධි අංශ, හමුදාපතිවරු, ආරක්ෂක මාණ්ඩලික ප්‍රධානී කෙනෙක්, ආරක්ෂක ඇමතිවරයෙක් අවශ්‍ය වෙන්නේ නැහැ. ආරක්ෂක ලේකම් හිටියහම ඇති ස්වාමීනි'' යනුවෙන් හේමසිරි ප්‍රනාන්දු මහතා සාක්ෂි ලබාදුන්නේය.

සහරාන් හෂීම්ට නිදහසේ මෙරට තුළ ක්‍රියාත්මක වීමට පොලිස් දෙපාර්තමේන්තුවේ ඇතැම් නොසැළකිලිමත් ක්‍රියාකලාපයන් හේතු වු බව හිටපු පොලිස්පති පූජිත් ජයසුන්දර මහතා අද ජනාධිපති කොමිසම හමුවේ පිළිගෙන තිබේ.

පාස්කු ප්‍රහාරයට පෙර සහාරාන්ගේ කණ්ඩායමේ සාමාජිකයෙකු වන “ආමි මොහිදින්“ අත්අඩංගුවට ගැනීමට හැකියාවක් උදාවු අවස්ථාවේ අපරාධ පරික්ෂණ දෙපාර්තමේන්තුව එම අත්අඩංගුවට ගැනීම සිදුකළේ නම් පාස්කු ඉරුදින එල්ල වූ ත්‍රස්ත ප්‍රහාරය වළක්වා ගැනීමටද ඉඩ තිබු බව එහිදි වැඩිදුරටත් සාක්ෂිදෙමින් ඔහු කියා සිටියේය.

හිටපු පොලිස්පති පූජිත් ජයසුන්දර මහතා සාක්ෂි ලබාදීම සඳහා ඊයේ (28) ජනාධිපති කොමිසම හමුවට පැමිණියේ සිව්වන දිනටය.

එහිදී, රජයේ අතිරේක සොලිසිටර් ජනරාල්වරිය විමසා සිටියේ 2017 මාර්තු මස 10 වන දින කාන්තන්කුඩි ආලියාර් මංසන්ධියේ ඇතිවු ගැටුම සම්බන්ධයෙන් සහරාන් හෂීම් ඇතුළු සැකකරුවන් අත්අඩංගුවට ගන්නා ලෙස වරෙන්තු නිකුත් කර තිබියදිත් පොලීසිය ඔවුන් අත්අඩංගුවට ගැනීමට කටයුතු නොකළේ මන්ද යන්නය.

එයට පිළිතුරු දෙමින් හිටපු පොලිස්පති පූජිත් ජයසුන්දර මහතා කියා සිටියේ අදාළ සැකකරුවන් ඒ වනවිට එම ප්‍රදේශයෙන් පළාගොස් බවත් ඔවුන් පදිංචි ස්ථිර ලිපිනයක් පිළිබඳ නොදැන සිටීම සහ ඇතැම් පුද්ගලයින් එම සැකකරුවන් සඟවාගෙන සිටීම මෙම අත්අඩංගුවට නොගැනීමට හේතු වූ බවත් ය.

එහිදී රජයේ අතිරේක සොලිසිටර් ජනරාල්වරිය විමසා සිටියේ සහරාන් සමග සබඳතා පැවැත්වු ආමි මොහිදින් නැමැත්තා සැඟව සිටින ස්ථානය රාජ්‍ය බුද්ධි සේවය විසින් අපරාධ පරික්ෂණ දෙපාර්තමේන්තුවේ ඩයස් නම් නිලධාරියාට පෙන්වා දී තිබියදීත් සැකකරු අත්අඩංගුවට ගැනීමට කටයුතු කර නොමැත්තේ මන්ද යන්නය.

"මේක හරි ව්‍යාකූල තත්ත්වයක්. ඔවුන් ඒ අවස්ථාවේ වහාම වරෙන්තුකරුව අත්අඩංගුවට ගත යුතුව තිබුණා. අත්අඩංගුවට ගැනීමෙන් පසු නීති කෘත්‍යයන් ඉටුකර ඔහුව තොරතුරුකරුවෙකු ලෙස භාවිතා කිරීම ගැටලුවක් නැහැ. නමුත් ඔවුන් ආමි මොහිදින් නැමැත්තාව තොරතුරුකරුවෙකු ලෙස භාවිතා කළායැයි වාර්තාවෙන්නේ සැකකරු අත්අඩංගුවට නොගත් පසුබිමක," යැයි පූජිත් ජයසුන්දර මහතා සක්ෂි ලබාදුන්නේය.

එහිදී, ජනාධිපති කොමිසමේ සාමාජික අභියාචනාධිකරණය විනිසුරුවරයා විමසා සිටියේ අපරාධ පරීක්ෂණ දෙපාර්තමේන්තුව ලද අවස්ථාවේ ආමි මොහිදින් අත්අඩංගුවට ගත්තානම් ඔහුගෙන් සහරාන් හෂිම්ගේ ත්‍රස්ත ජාලය පිළිබඳ  තොරතුරු අනාවරණය කරගෙන මෙම ප්‍රහාරය වළක්වා ගැනීමට ඉඩ තිබුණා නොවේද යන්නය.

"ඔව් ස්වාමිනි, මට දැන් එහෙම හිතෙනවා. ආමි මොහිදින් සහරාන් සමග පවත්වා ඇති සම්බන්ධතාවය බලද්දි ඔහු අත්අඩංගුවට ගත්තානම් බොහෝ කරුණු හෙළිදරව් කරගන්න තිබ්බා. එහෙම හෙළිදරව් වුණානම් ඒ ඔස්සේ සහරාන් ඇතුළු අනිකුත් සැකකරුවන්වත් අත්අඩංගුවට ගෙන මෙවැනි ප්‍රහාරයක් සිදුවීම වළක්වා ගන්න තිබුණා," යැයි ජයසුන්දර මහතා වැඩිදුරටත් කියා සිටියේය.

එහිදී, ජනාධිපති කොමිසමේ සාමාජික අභියාචනාධිකරණය විනිසුරුවරයා පෙරළා විමසා සිටියේ සහරාන්ට නිදහසේ කටයුතු කිරීමට පොලිස් දෙපාර්තමේන්තුවේ නිලධාරින්ගේ නොසැලකිත්මත් ක්‍රියාකලාපය හේතුවුණා කියන එක ඔබ පිළිගන්නවාද යන්නය.

"ඔව් ස්වාමිනි, මම එක පිළිගන්නවා. සහරාන්ට නිදහසේ කටයුතු කිරීමට පොලිස් දෙපාර්තමේන්තුවේ නිලධාරින්ගේ නොසැලකිලිමත් ක්‍රියාකලාපය හේතුවුණා කියන එක," යැයි හිටපු පොලිස්පති පූජිත් ජයසුන්දර මහතා පිළිතුරු ලබාදුන්නේය.

මෙහිදී රජයේ අතිරේක සොලිසිටර් ජනරාල්වරිය ප්‍රශ්න කර සිටියේ අප්‍රේල් 09 දින රාජ්‍ය බුද්ධි සේවයෙන් සහ ජාතික බුද්ධි ප්‍රධානියා ඔබ වෙත යොමුකරන ලද ප්‍රහාරයක් පිළිබද පුර්ව දැනුවත් කිරීමේ විදෙස් බුද්ධි තොරතුරු සම්බන්ධයෙන් ඔබ කුමන ක්‍රියාමාර්ගයක් අනුගමනය කළේ ද යන්නය.

"ස්වාමිනි, මම ඒ ලිපියට FNA කියලා දාලා, මගේ යටතේ සිටි ජ්‍යෙෂ්ඨ නියෝජ්‍ය පොලිස්පතිවරු 04 දෙනෙක්ට යැව්වා. ඒ යැව්වෙත් පණිවුඩකරුවන් සිව්දෙනෙක්ගේ අතේ. මම එක නිශ්චිත වැදගත් තොරතුරක් ලෙස සැලකුවා. එකයි එහෙම කළේ, " යැයි පූජිත් ජයසුන්දර මහතා පිළිතුරු ලබාදුනි.

"ඇයි ඔබ FNA කියලා දැම්මේ. ඔබ පොලිස්පතිවරයා ලෙස ඊට වඩා වැඩියමක් සදහන් කළ යුතුව තිබුණා නේද..? ඇයි කළයුතු දේ පිළිබඳ උපදෙස් දීමක් සිදු නොකළේ," යැයි ජනාධිපති කොමිසමේ සභාපති විනිසුරුවරයා මෙහිදි විමසා සිටියේය.

"ස්වාමිනි, FNA කියන්නේ For Necessary Action කියන එක. නමුත් සමහර අය මේක For No Action හැටියට අපහාසාත්මකවත් අරන් තිබ්බා. මේක නිශ්චිත තොරතුරක් විදේශ බුද්ධි අංශයකින් එවපු. නමුත් මීට අදාළව කිසිම තොරතුරක් අපේ රාජ්‍ය බුද්ධි සේවයෙන් සොයාගෙන තිබුණේ නැහැ. ඔවුන් මේක වගකීම් සහගත විදිහට නෙමෙයි එවලා තිබ්බේ. මොකද, ඉහත සඳහන් තොරතුර පිළිබඳව තවදුරටත් පරීක්ෂණ කරනවා," යැයි මේකේ සදහන් වෙනවා. ඒ කියන්නේ අවසානයක් නැහැ. නිලන්ත ජයවර්ධන ප්‍රමුඛ රාජ්‍ය බුද්ධි සේවයට තියෙන පහසුකම් හා වරප්‍රසාද එක්ක බලද්දි ඔවුන්ට නිරතවෙන්න තියෙන එකම වෘත්තීමය ක්ෂේත්‍රය තමයි බුද්ධි තොරතුරු කියන්නේ. එහෙම වටපිටාවක් තුළත් ඔවුන් මේකට කිසිවක් එකතු කර තිබුණේ  නැහැ. විදෙස් බුද්ධි තොරතුර විතරයි. නමුත් ඒ තොරතුර වැදගත්. මේක මට එද්දි Top Secret Eyes Only කියන එක ගහලා තිබ්බේ. Eyes Only කියන්නේ මගේ අවධානයට විතරයි කියන එක. නමුත් එක මගේ අවධානයට විතරක් යොමුවෙලා මදි නිසා තමයි ක්‍රියාත්මක විය හැකි මගේ යටතේ සිටි ජ්‍යෙෂ්ඨතම නිලධාරින් 04 දෙනාට යැව්වේ. මෙවැනි දෙයකට ක්‍රියාත්මක විය යුතු ආකාරය ඔවුන් දන්නවා," යැයි පූජිත් ජයසුන්දර මහතා පැහැදිලි කළේය.

ඔහු වැඩිදුරටත් කියා සිටියේ, "මට ස්වාමිනී ඒ වෙද්දි විස්තරාත්මකව උපදෙස් දීමට හැකියාවක් තිබුණේ නැහැ. ඒ වෙද්දි තිබ්බ දේශපාලන වටපිටාවත් එක්ක කතා කළේම සංහිදියාව ගැන. මට දේශපාලනිකව පීඩා ආවා. වැඩේ කෙරෙන්නත් ඕනේ. හැබැයි අනිත් පැත්තට චෝදනා එන්නත් පුළුවන්. ඒ නිසයි මම මේ ලිපිය මේ විදිහට මගේ පහළ ජ්‍යෙෂ්ඨ නිලධාරින්ට යොමු කළේ. අනික මම මේ වෙලාව වෙද්දි රටේ නායකයා මාත් එක්ක තිබ්බ අමනාපකම් සහ ගැටලු ගොඩකින් පීඩා විඳලා හිටියේ. නමුත් ඒකෙන් කියවෙන්නේ නැහැ මම රාජකාරිය පැහැර හැරියා කියලා. මොකද රාජ්‍ය බුද්ධි සේවය හෝ කවුරුන් හෝ මට ත්‍රස්තවාදි ක්‍රියා ගැන තොරතුරු දිලා තිබුණේ නැහැ. කියලා තිබුණේ අන්තර්ජාලය ඔස්සේ පුද්ගලයින් අභිප්‍රේරණය කරනවා කියලා විතරයි," යනුවෙන් ජයසුන්දර මහතා වැඩිදුරටත් ජනාධිපති කොමිසම හමුවේ සාක්ෂි ලබාදෙමින් පැවසීය.

පාස්කු ප්‍රහාරය සම්බන්ධයෙන් පරීක්ෂණ සිදුකරන කොමිසම අද හිටපු ජනාධිපති මෛත්‍රීපාල සිරිසේන මහතාට, ඔහුගේ පෞද්ගලික ලේකම්වරයාට සහ කොළඹ පදවියේ සහයක රදගුරුතුමන්ලා තිදෙනාට දැඩිලෙස අවවාද කර තිබේ.

සාක්ෂිකරුවන් විසින් කොමිසමේ දී කරන යම් යම් ප්‍රකාශයන් සම්බන්ධයෙන් මාධ්‍ය නිවේදන නිකුත් කිරීමෙන් වළකින ලෙස කොමිසම ඔවුන්ට අවවාද කර ඇත. 

කොමිෂන් සභාවේ සාක්ෂි විමසීම සම්බන්ධයෙන් අදාළ පාර්ශව නිකුත් කර තිබු මතභේදාත්මක මාධ්‍ය නිවේදන සම්බන්ධයෙන් ජනාධිපති කොමිසමේ තීරණය ප්‍රකාශයට පත්කරමින් ඔවුන්ට අවවාද දී තිබේ.

පාස්කු කොමිසම හමුවේ සාක්ෂි දීමේදී හිටපු ආරක්ෂක ලේකම් හේමසිරි ප්‍රනාන්දු මහතා අසත්‍ය ප්‍රකාශ කළ බවට හිටපු ජනාධිපති මෛත්‍රීපාල සිරිසේන මහතාගේ ලිපි ශීර්ෂය යටතේ ඔහුගේ පෞද්ගලික ලේකම්වරයා පසුගිය 20 වනදා නිකුත් කළ මාධ්‍ය නිවේදනයට අදාළව අද (24) පෙරවරුවේ කොමිසම හමුවේ පෙනී සිටින්නැයි හිටපු ජනාධිපති මෛත්‍රීපාල සිරිසේන මහතාටත් ඔහුගේ පෞද්ගලික ලේකම්වරයාටත් කොමිසම ඊයේ (23) නොතීසි නිකුත් කළේ ය.

එසේවුවද හිටපු ජනාධිපති මෛත්‍රීපාල සිරිසේන මහතා අද පෙරවරුවේ කොමිසම හමුවේ පෙනී නොසිටි අතර ඔහු වෙනුවෙන් කොමිසමේ පෙනී සිටියේ ජනාධිපති නීතීඥ මෛත්‍රී ගුණරත්න මහතාය. 

නමුත් හිටපු ජනාධිපතිවරයාගේ පෞද්ගලික ලේකම් සමීර ද සිල්වා මහතා අද පෙරවරුවේ කොමිසම හමුවට පැමිණ සිටියේ ය.

මේ අතර කොළඹ අගරදගුරු පදවියේ සහයක රදගුරුතුමන්ලා තිදෙනාටද අද පෙරවරුවේ ජනාධිපති කොමිසම හමුවේ පෙනී සිටින ලෙස නිකුත් කළ නොතීසී නිකුත් කර තිබුණි.

ඒ පාර්ලිමේන්තු මන්ත්‍රී හරීන් ප්‍රනාන්දු මහතා පාස්කු ප්‍රහාරය පිළිබද කාදිනල් හිමිපාණන් දැන සිටින්නට ඇතැයි කළ ප්‍රකාශය ප්‍රතික්ෂේප කරමින් කොළඹ අගරදගුරු පදවියේ සහයක රදගුරු තුමන්ලා නිකුත් කළ නිවේදනයට අදාළවය.

කෙසේවෙතත් අද කොමිසම හමුවේ පෙනී සිටියේ කොළඹ අගරදගුරු පදවියේ සහයක රදගුරු අතිඋතුම් මැක්ස්වෙල් සිල්වා රදගුරුතුමන් පමණක් වන අතර නොතීසි නිකුත් කර තිබු කොළඹ අගරදගුරු පදවියේ සහයක රදගුරුතුමන්ලා වන අතිඋතුම් ඇන්තනි ජයකොඩි සහ ඇන්ටන් රංජිත් යන රදගුරුතුමන්ලා දෙදෙනා කොමිසම හමුවේ පෙනී නොසිටියේය.

ඒ අනුව අදාළ මතභේදාත්මක මාධ්‍ය නිවේදන සම්බන්ධයෙන් ජනාධිපති කොමිසමේ සභාපති විනිසුරුවරයා විසින් කොමිසමේ නියෝගය ප්‍රකාශයට පත්කළේ ය.

මෙරට ව්‍යාප්තවෙමින් තිබූ ඉස්ලාම් අන්තවාදී ක්‍රියාකාරකම් සම්බන්ධයෙන් පොලීසිය මගින් කිසිදු විවෘත විමර්ශනයක් සිදු නොකරන ලෙස හිටපු ජනාධිපති මෛත්‍රීපාල සිරිසේන මහතා තමන්ට උපදෙස් දී තිබූ බව හිටපු පොලිස්පති පූජිත් ජයසුන්දර මහතා පාස්කු ප්‍රහාරය පිළිබඳ විමර්ශනය කරන ජනාධිපති විමර්ශන කොමිසම හමුවේ අද (23) පැවසීය.

එහිදී වැඩිදුරටත් සාක්ෂි දෙමින් ඔහු කියා සිටියේ තමන් කිසිවෙකුට නොකියා සිතෙහි සිරකරගෙන සිටි බොහෝ දෑ ජනාධිපති කොමිසම හමුවේ ඉදිරියේදි හෙළිකිරීමට බලාපොරොත්තු වන බවය.

පොලිස්පති තනතුර දරමින් සිටි කිසියම් අවස්ථාවකදි තමා ජනාධිපතිවරයාගෙන් උපදෙස් නොගෙන අගමැතිවරයාගෙන් උපදෙස් ලබාගත්තේදැයි එහිදී කොමිසම ඔහුගෙන් විමසා සිටි අතර ඊට පිළිතුරු දුන් හිටපු පොලිස්පතිවරයා "නැහැ කිසිම අවස්ථාවක එහෙම කළේ නැහැ. නමුත් දේශපාලනික වශයෙන් 2018 ඔක්තෝම්බර් මාසයේ ඇති වූ දින 52 ආණ්ඩුව වගේ සිදුවීම්වලින් පස්සේ ජනාධිපතිවරයා සහ අගමැතිවරයා අතර පැවති සහසම්බන්ධතාවය පළුදු වුණාම මට ඔවුන් දෙදෙනා සමග සමබරව කටයුතු කරගෙන යාම ඉතා අසීරු වුණා. ජ්‍යෙෂ්ඨ නිලධාරින්ගේ ස්ථාන මාරුවීම් සම්බන්ධයෙන් පොලිස් කොමිසම දැනුවත් කළ යුතුව තිබුණා. නමුත් පොලිස් කොමිසමේ නිර්දේශ මත කළ ඇතැම් ස්ථාන මාරුවීම් නවත්වන්න සිද්ධවුණා" 

එකම කරුණක් සම්බන්ධයෙන් ජනාධිපතිවරයා සහ අගමැතිවරයා දෙආකාරයකට උපදෙස් දුන් අවස්ථා පැවතියේදැයි කොමිසම විමසූ විට පූජිත් ජයසුන්දර මහතා පැවසුවේ එවැනි අවස්ථා වල තමා ජනාධිපතිවරයාගේ අණට එකඟ වූ බවය.

තමා පවසන්නේ 19 වන ආණ්ඩුක්‍රම ව්‍යවස්ථා සංශෝධනය මගින් ස්වාධීන පොලිස් කොමිසම බලාත්මක කර තිබියදීත් එහි ක්‍රියාකාරිත්වයට බාහිර පාර්ශව බලපෑම් කළ බවදැයි කොමිසම ඔහුගෙන් යළි විමසා සිටියේය.

"2018 මුල් භාගයේ ඉඳලා බලපෑම් ආවා. ජ්‍යෙෂ්ඨ නියෝජ්‍ය පොලිස්පතිවරුන්, නියෝජ්‍ය පොලිස්පතිවරුන්, කොට්ඨාස භාර නිලධාරින් වගේ තනතුරු වලට ස්ථාන මාරු ලබාදීමේදි පොලිස් කොමිසමේ නිර්දේශ ක්‍රියත්මක කළ නොහැකි වුණා. ඒවා නැවැත්තුවා" යැයි පූජිත් ජයසුන්දර මහතා ප්‍රකාශ කළේය.

එහිදි කොමිසමේ සාමාජික අභියාචනාධිකරණය විනිසුරුවරයා "කව්ද නැවැත්තුවේ" යැයි විමසූ විට "ජනාධිපතිවරයා" යැයි පූජිත් ජයසුන්දර මහතා ඊට පිළිතුරු දුන්නේය.

එහිදී වැඩිදුරටත් සාක්ෂි දුන් ජයසුන්දර මහතා මෙසේ ද පැවසීය,

"2018 ඔක්තෝම්බර් 23 ජාතික ආරක්ෂක කවුන්සිලය පැවැත්වෙන්න නියමිතව තිබුණා. නමුත් පස්වරුව වෙනකං ඒ පිළිබඳව මා දැනුවත් කළේ නැහැ. පස්වරු 4.30 ට විතර මම එවකට ආරක්ෂක ලේකම් කපිල වෛද්‍යරත්න මහතාට කථා කරලා ඇහුවා. 'සර් අද Security Council එක තියෙනවාද? මම නම් දැනුවත් කරලා නැහැ.' කියලා. එතකොට මට කපිල වෛද්‍යරත්න මහතා කිව්වා පූජිත් මට ඔයාට කියන්න බැරුව හිටියේ. නමුත් දැන් අහපු නිසා කියන්නම්. ජනාධිපතිතුමා කිව්වා ඔබව කැඳවන්න එපා කියලා".

"ආරක්ෂක කවුන්සිලයට එන්න එපා කිව්වාම මම ගොඩාක් අපහසුතාවයට පත්වුණා. මොකද ආරක්ෂක කවුන්සිලයේ කතාකරන කිසිම දෙයක් මට දැනගන්න විදිහක් තිබ්බේ නැහැ. ආරක්ෂක කවුන්සිලයෙන් ලිඛිතව කිසිම දෙයක් මට ආවෙත් නැහැ. පස්සේ මගෙන් පස්සේ පොලීසියේ හිටපු ජ්‍යෙෂ්ඨතම නිලධාරියාව ගෙන්වන්නේ නැතුව වෙන නිලධාරින් ආරක්ෂක කවුන්සිලයට ගෙන්වා තිබුණා" යනුවෙන්ද පූජිත් ජයසුන්දර මහතා වැඩිදුරටත් කියා සිටියේය.

එහිදී ජනාධිපති කොමිසමේ සාමාජික අභියාචනාධිකරණය විනිසුරුවරයා විමසා සිටියේ පාස්කු ප්‍රහාරය වැනි විනාශකාරි පෙරළියක ආරම්භය ඇතිවූයේ ඔය සිදුවීමෙන්ද යන්නයි.

"නැහැ. එහෙම්මම කියන්න බැහැ. 2012, 2013 වගේ කාලයේ ඉඳලා ජාත්‍යන්තරව ඇතිවුණු අන්තවාදී ක්‍රියාකාරකම්වලින් මෙරටට සිදුවන බලපෑම සම්බන්ධයෙන් පියවර නොගැනීම නිසා සමස්ථ ක්‍රියාවලියම පරිහානියට පත්වෙලයි තිබුණේ. නමුත් මේ සිදුවීමෙන් මට තොරතුරු ලැබීම නැවතීයාමෙන් තීරණ ගැනීම කෙරෙහි ප්‍රශ්න ඇතිවුණා" යනුවෙන් හිටපු පොලිස්පතිවරයා පිළිතුරු ලබාදුන්නේය.

පාස්කු ප්‍රහාරය සිදුවන අවස්ථාවේ මෙරට පොලිස්පතිවරයා ලෙස කටයුතු කළ හිටපු පොලිස්පති පූජිත් ජයසුන්දර මහතා අද ජනාධිපති කොමිසම හමුවේ සාක්ෂිදුන්නේ දෙවන දිනටය.

2012 වසරේ වැලිකඩ බන්ධනාගාරයේ ඇතිවූ කැරැල්ලේ දී රැඳවියන් 27 දෙනෙකු ඝාතනය කිරීමේ සිද්ධිය සම්බන්ධයෙන් විමර්ශන අවසන් කර තිබූ පසුබිමක යහපාලන ආණ්ඩු සමයේ දී යළි එම විමර්ශන ආරම්භ කළේ හිටපු බන්ධනාගාර හා පුනරුත්ථාපන අමාත්‍ය ඩී. එම් ස්වාමිනාදන් මහතාගේ බලපෑම් මත බව හිටපු පොලිස්පති පූජිත් ජයසුන්දර මහතා පිළිගෙන තිබේ.

ඒ දේශපාලන පළිගැනීම් පිළිබඳ සොයා බලන ජනාධිපති පරීක්ෂණ කොමිෂන් සභාව හමුවේ සාක්ෂි ලබාදෙමිනි.

හිටපු බන්ධනාගාර කොමසාරිස් එමිල් රන්ජන් ළමාහේවා මහතා දේශපාලන පළිගැනීම් පිළිබඳ සොයාබලන ජනපති කොමිසමට කළ පැමිණිල්ලකට අදාළව හිටපු පොලිස්පති පූජිත් ජයසුන්දර මහතා එහි වගඋත්තරකරුවෙකු ලෙස නම් කෙරුණි.

ඔහු අද (23) පළමුවරට කොමිසම හමුවේ සාක්ෂි ලබාදුන් අතර, කොමිසම විමසා සිටියේ,“යහපාලන රජය සමයේ පොලිස්පතිවරයා ලෙස ඔබ 2012 නොවැම්බර් මස 10 වැනිදා ඇතිවූ වැලිකඩ බන්ධනාගාර සිදුවීම පිළිබඳ නැවත විමර්ශනයක් ආරම්භ කළේ ද?“ යන්නය.

කොමිසම හමුවේ සාක්ෂි ලබාදෙමින් පූජිත් ජයසුන්දර මහතා සඳහන් කළේ, හිටපු අමාත්‍ය ඩී.එම්. ස්වාමිනාදන් මහතාගේ ප්‍රධානත්වයෙන් පැවති දූෂණ වීරෝධී කමිටු රැස්වීමකින් අනතුරුව එතුමා එවු ලිපියක් අනුව වැලිකඩ සිද්ධියට අදාළව නැවත පරීක්ෂණ ආරම්භ කරන්නැයි උපදෙස් ලැබුණු බවත්, ඒ අනුව 2017 වසරේ තමා අපරාධ පරීක්ෂණ දෙපාර්තමේන්තුවට නැවත මෙම සිදුවීමට අදාළ විමර්ශන ආරම්භකරන ලෙසට දැනුම්දුන් බවය.

අනතුරුව කොමිසම පූජිත් ජයසුන්දර මහතාගෙන් විමසා සිටියේ සිටියේ,“දේශපාලන ලිපියක් මත ඔබ නැවත මෙම විමර්ශන ආරම්භ කළේ ද?“ යන්නය. 

ඊට පිළිතුරු ලබාදෙමින් පූජිත් ජයසුන්දර මහතා ප්‍රකාශ කළේ, දැන් කරුණු සොයා බැලීමේ දී එසේ සිදුවන්නට ඇතැයි තමාට හැඟීයන බවය.

එමෙන්ම දූෂණ විරෝධී කමිටුවේ රැස්වීම්වලටද තමා සහභාගි වූ බවත් හිටපු අමාත්‍ය ස්වාමිනාදන් මහතා මෙම පරීක්ෂණ නැවත ආරම්භ කිරීමට මෙම ලිපිය සකස් කර ඇත්තේ, එම කමිටුව මගින් ගත් තීරණයක් නිසා විය හැකි බවත් පූජිත් ජයසුන්දර මහතා ප්‍රකාශකර සිටියේ ය.

 පාස්කු ඉරිදා ප්‍රහාරය ගැන සොයන ජනාධිපති කොමිසමට පැමිණි හිටපු ජනාධිපති මෛත්‍රීපාල සිරිසේන මහතා මීට සුළු මොහොතකට පෙර පිටව ගොස් තිබේ.

හිටපු පොලිස්පති පූජිත් ජයසුන්දර මහතා ප්‍රකාශ ලබාදීම සඳහා පාස්කු කොමිසමට පැමිණ තිබිණි.

හිටපු ජනධිපතිවරයා මෙලෙස ජනපති කොමිසමට පැමිණ තිබුණේ කොමිසමේ සාක්ෂි සඳහා ඇහුම්කන් දීමට ය. 

හිටපු ජනාධිපති මෛත්‍රීපාල සිරිසේන මහතාට මහතා අධිකරණයට අපහාස කිරීමක් සේ සලකා ඊට අදාළ ක්‍රියාමාර්ග ගන්නා ලෙස පාස්කු බෝම්බ ප්‍රහාර සම්බන්ධයෙන් විමර්ශනය කරන ජනාධිපති කොමිසමේ දී නීතිඥවරයෙක් ඉල්ලා සිටියේය.

හිටපු ආරක්ෂක ලේකම් හේමසිරි ප‍්‍රනාන්දු මහතා විසින් කොමිසමේ දී කළ ප්‍රකාශයක් ගැන හිටපු ජනාධිපතිවරයාගේ මාධ්‍ය අංශය නිකුත් කළ නිවේදනය සම්බන්ධයෙන් හේමසිරි ප‍්‍රනාන්දු මහතාගේ නීතිඥයා විසින් මෙම ප්‍රශ්නය මතු කර ඇත.

මෙවන් මාධ්‍ය නිවේදන හරහා කිසිවකුට හෝ අගතියක් සිදුවන්නේ නම් නීතිඥයෙකු මාර්ගයෙන් කොමිසම හමුවේ පෙනී සිට හරස් ප්‍රශ්න විමසීමට අවස්ථාව ලබාදී ඇති බවත් එය නොතකා මෙවැනි නිවේදන නිකුත් කිරීමෙන් කොමිසමේ අධිකාරී බලයට හා ගෞරවයට හානි සිදුකර ඇතැයි ද එම නීතිඥයා කියා සිටියේය.

මෙම කොමිසම ද සිදු කරන්නේ අධිකරණමය කටයුත්තක් නිසා එම කටයුතු බාහිර පුද්ගලයකු විවේචනය කර ඇති නිසා එය අධිකරණයට අපහාස කිරීමක් සේ සලකන ලෙස ද නීතිඥවරයා ඉල්ලා සිටියේය.

එහිදී හිටපු ජනාධිපතිවරයා වෙනුවෙන් පෙනී සිටි නීතීඥවරයා කියා සිටියේ තමන් මෙම මාධ්‍ය නිවේදන සම්බන්ධයෙන් කිසිවක් නොදන්නා බවත් හිටපු ජනාධිපතිවරයාගෙන් විමසා පිළිතුරක් ලබාදෙන බවත්ය.

හිටපු ජනාධිපතිවරයාගේ පෞද්ගලික ලේකම්වරයාගේ අත්සනින් එම මාධ්‍ය නිවේදනය නිකුත් කර තිබිණි.

හිටපු ජනාධිපති මෛත්‍රිපාල සිරිසේන මහතා අද (22) උදෑසන පාස්කු කොමිසමට පැමිණ තිබේ.

ඒ කොමිසමේ සාක්ෂි සඳහා ඇහුම්කන් දීමට ය. 

මේ අතර, හිටපු පොලිස්පති පූජිත් ජයසුන්දර මහතා ප්‍රකාශ ලබාදීම සඳහා පාස්කු කොමිසමට පැමිණ තිබේ.

පාස්කු ඉරුදින ත්‍රස්ත ප්‍රහාරය පිළිබඳ තම පියා පෙර දැනුවත්ව සිටියේ යැයි මතභේදාත්මක ප්‍රකාශයක් සිදුකළ හිටපු අමත්‍ය පාර්ලිමේන්තු මන්ත්‍රී හරීන් ප්‍රනාන්දු මහතා ඊයේ (16) පාස්කු ප්‍රහාරය පිළිබඳ විමර්ශන කොමිසම හමුවේ කාදිනල් හිමියන් සම්බන්ධයෙන් කළ ප්‍රකාශයක් හේතුවෙන් එහි උණුසුම් තත්ත්වයක් හටගෙන ඇතැයි වාර්තා වේ.

ඒ කාදිනල් හිමියන් ප්‍රහාරය සම්බන්ධයෙන් පෙර දැනුවත්ව සිටියේ ද යන්න පිළිබඳ විශේෂ විමර්ශනයක් කළ යුතු බවට හරීන් ප්‍රනාන්දු මන්ත්‍රීවරයා සඳහන් කිරීමත් සමග ය. මෙහිදී කොමිසමේ සභාපති විනිසුරුවරයාට මන්ත්‍රීවරයා හට දැඩි ලෙස අවවාද කිරීමටද සිදුවිය.

පාස්කු කොමිසම හමුවේ සාක්ෂි දුන්නේ පාස්කු ඉරුදින ත්‍රස්ත ප්‍රහාරය පිළිබද තම පියා පෙර දැනුවත්ව සිටියේ යැයි මතභේදාත්මක ප්‍රකාශයක් සිදුකළ හිටපු අමත්‍ය පාර්ලිමේන්තු මන්ත්‍රී හරීන් ප්‍රනාන්දු මහතා ය.

එහිදි සාක්ෂිදෙමින් මන්ත්‍රීවරයා කියා සිටියේ ඉකුත් වසරේ පාස්කු ඉරුදින පළමු ප්‍රහාර මාලාව එල්ල වු අවස්ථාවේ තමන් ඇමතූ තම සහෝදරිය " මල්ලි අපි පල්ලි යන්න හිටියේ, කිංස්බරි හෝටලයට යන්න හිටියේ තාත්තා ඊයේ රෑ කතා කරලා කිව්වා යන්න එපා කියලා " යනුවෙන් සඳහන් කළ බවය.

එය එවක අග්‍රාමාත්‍ය රනිල් වික්‍රමසිංහ මහතාට දැනුම්දුන් පසු කොළඹට පැමිණි තමන් පෞද්ගලික රෝහලක දැඩි සත්කාර ඒකකයේ ප්‍රතිකාර ලබමින් සිටි තම පියා හමුවී ප්‍රහාරය පිළිබඳ පෙර දැනුවත් වුයේ කෙසේදැයි විමසු විට " තමුසෙට වඩා ගොඩාක් දේවල් මම දන්නවා" යනුවෙන් පමණක් පියා පිළිතුරු දුන් බව මන්ත්‍රීවරයා සඳහන් කළේ ය.

අපරාධ පරික්ෂණ දෙපාර්තමේන්තුවේ නිලධාරියෙකු තම පියාට මෙම පෙර දැනුවත්කිරීම සිදු කළේදැයි සැක සහිත බවද මන්ත්‍රීවරයා පැවසුවේ ය.

මෙහිදී කොමිසමට කරුණු දැක්වූ රජයේ ජ්‍යෙෂ්ඨ අධිනීතිඥවරයා කියා සිටියේ, පාස්කු ප්‍රහාරයට පෙර දින අපරාධ පරික්ෂණ දෙපාර්තමේන්තුවේ පොලිස් සැරයන් නන්දලාල් නැමත්තකු සමග හරීන් ප්‍රනාන්දු මන්ත්‍රීවරයාගේ පියා තත්ත්පර 356 ක දුරකථන සංවාදයක නිරත වී ඇතැයි දුරකථන දත්ත වාර්තා ඔස්සේ අනාවරණය වී තිබෙන බව ය.

වනාතවිල්ලුව පුපුරණ ද්‍රව්‍ය සොයාගැනීමට සහ සහරාන් හෂීම්ගේ කණ්ඩායමේ සමාජික ආමි මොහිදින් නැමැත්තා සොයා අපරාධ පරික්ෂණ දෙපාර්තමේන්තුවේ කණ්ඩායමක් පාසිකුඩා ගිය අවස්ථාවට මෙම නන්දලාල් නැමැති සැරයන්වරයා සම්බන්ධ වී ඇති අතර ප්‍රහාරයෙන් පසු ආමි මොහිදින් අත්අඩංගුවට ගත් අවස්ථාවේ ඔහුගේ දුරකතනයේ  තිබි සොයාගෙන තිබුනේද මෙම නන්දලාල් නැමැත්තාගේ ඡයාරූපයක් බව මෙහිදී රජයේ ජ්‍යෙෂ්ඨ අධිනීතිඥවරයා ප්‍රකාශ කළේය.

මෙහිදී මන්ත්‍රීවරයා කොමිසම හමුවේ වැඩිදුරටත් පැවසුවේ, කිසිදු අවස්ථාවක තම පියා තමන් අමතා පෞද්ගලිකව පල්ලිවලට යන්න එපා යැයි නොකී අතර ඔහු තම සහෝදරිය අමතා කී දෙය පාස්කු ප්‍රහාරය සිදුවු දින පැවති මාධ්‍ය හමුවක දී තමන් පැවසු බවය.

ඒ අනුව " මගේ පියා දැන් ඉන්නේ රෝහලේ, ඊයේ රෑ මට කතාකරලා කිව්වා මේ පල්ලියට එහෙම යන්න එපා මෙහෙම ආරංචියක් තියෙනවා කියලා. බුද්ධි අංශවල මේ තොරතුරු තිබිලා තියෙනවා. තාත්තා කතාකරලා කිව්වේ කොච්චිකඩේ පල්ලි එහෙම යන්න එපා කියලා. " යනුවෙන් තමන් මාධ්‍ය හමුවේ කළ ප්‍රකාශය මාධ්‍ය විසින් දේශපාලනිකව තමන්ට මඩ ගැසීමට අවභාවිතා කළ බවට මන්ත්‍රීවරයා චෝදනා කර සිටියේය.

එහිදී කොමිසමේ සිටි අභියාචනාධිකරණ විනිසුරුවරයා විමසා සිටියේ " ඔබ මාධ්‍ය හමුවේ නොකී දෙයක් මාධ්‍ය ඔස්සේ ප්‍රචාරය කර තිබුනේද ?" යන්නය.

තමන් කී දේ පමණක් මාධ්‍ය ප්‍රචාරය කර තිබු බවත් තමන් විනාඩි 45 ක පමණ මාධ්‍ය හමුවක් පැවැත්වුවද මාධ්‍ය ප්‍රචාරය කරන ලද්දේ සිය පියා ප්‍රහාරය ගැන දැනසිටියා යැයි තමන් පැවසු කොටස පමණක් බවත් මන්ත්‍රීවරයා සදහන් කළේය.

එවිට කොමිසමේ සමාජික විනිසුරුවරයා කියා සිටියේ, ඔබ විනාඩි 45 ක ප්‍රවෘත්ති සාකච්ඡාවක් පැවැත්වුවද මාධ්‍යයට උපුටාගෙන විකාශය කළ හැක්කේ එම ප්‍රවෘත්ති සාකච්ඡාවේ ඇති උණුසුම්ම විනාඩිය නොවේ ද යන්නය.

මෙම සිදුවීම සම්බන්ධයෙන් අගරදගුරු හිමිපාණන්  "අපේ මිනිස්සු මැරුණා, ඇමති පුතා බේරුණා. " යනුවෙන් පැවසීම තුළද තමන් විශාල වශයෙන් අපහසුතාවයට පත්වු බව මෙහිදී මන්ත්‍රීවරයා පැවසුවේ ය.

මෙම ප්‍රහාරය පිළිබද බොහෝ පාර්ශව පෙර දැනුවත්ව සිට ඇති බවට කරුණු අනාවරණය වී ඇති පසුබිමක පල්ලිය පමණක් කිසිවක් නොදැන සිටි බව තමන් විශ්වාස නොකරන බව හරින් ප්‍රනාන්දු මන්ත්‍රීවරයා කොමිසම හමුවේ වැඩිදුරටත් පැවසුවේ ය.

මෙරට කතෝලික සභාවේ නායකයා සෑම වර්ෂයකම පාස්කු ඉරුදින උදෑසන දිව්‍ය පුජාවක් පවත්වන පසුබිමක, පසුගිය වසරේ පමණක්  කාදිනල් හිමිපාණන් එම දිව්‍ය පුජාව නොපවත්වන ලද්දේ උන්වහන්සේ ප්‍රහාරය සම්බන්ධයෙන් පෙර දැනුවත්ව සිටි නිසාද යන්න පිළිබද විශේෂ විමර්ශනයක් කළ යුතු බව හරින් ප්‍රනාන්දු මහතා ජනාධිපති කොමිසමට දැන්වීය.

මන්ත්‍රීවරයාගේ එම ප්‍රකාශයත් සමග නැගි සිටි කාදිනල් හිමිපාණන් වෙනුවෙන් පෙනී සිටි ජනාධිපති නීතිඥ වරයා ප්‍රශ්න කර සිටියේ " අගරදගුරු හිමිපාණන් සෑම වර්ෂයකම පාස්කු දේව මෙහෙය පවත්වන්නේ පාස්කු ඉරුදිනට පෙර සෙනසුරාදා දින මධ්‍යම රාත්‍රීයේ බවත්, පසුගිය වසරේද සිරිත් පරිදි අප්‍රේල් 20 වන දින මධ්‍යම රාත්‍රීයේ කාදිනල් හිමිපාණන් කොටහේන සාන්ත ලුසියා ආසන දෙව්මැදුරේ එම දිව්‍ය පුජාව පැවැත්වු බවත් මම ඔබට යෝජනා කළහොත් එය පිළිගන්නේද ? යන්නය.

එහිදි හරීන් ප්‍රනාන්දු මහතා කියා සිටියේ, තමන් ඒ පිළිබද නොදැන සිටි අතර ඉහත කළ ප්‍රකාශය පදනම් විරහිත ව හුදෙක් මනසට ආ පමණින් සාක්ෂි නොමැතිව ප්‍රකාශ කළේ යැයි පිළිගන්නා බවය.

ඉන් අනතුරුව ජනාධිපති නීතිඥවරයා හරින් ප්‍රනාන්දු මන්ත්‍රීවරයාගෙන් කොළඹ කතෝලික පෞද්ගලික පාසලක ඉගෙනුම ලබන මන්ත්‍රීවරයාගේ ඥාති පුත්‍රයකු පිළිබඳ විමසීමත් සමඟ මන්ත්‍රීවරයා නොසන්සුන් විය.

එහිදි නීතිඥවරයා ජනාධිපති කොමිසම හමුවේ කියා සිටියේ, අදාළ පාසලේ රගර් ක්‍රීඩා කණ්ඩායම ඉකුත් වසරේ පාස්කු ඉරුදින කොළඹ සුගතදාස ක්‍රීඩාංගනයේ පුහුණුවීම් වල නිරත වීමටත්, පුහුණුවීමෙන් පසු කොච්චිකඩේ සාන්ත අන්තෝනි දෙව්මැදුරට යාමටත් යොදාගෙන සිට ඇති බවය.

නමුත් අදාළ කණ්ඩායමේ සිටින හරීන් ප්‍රනාන්දු මන්ත්‍රීවරයාගේ ඥාති පුත්‍රයා පමණක් ත්‍රස්ත ප්‍රහාරය එල්ල වු දින පුහුණු සැසියට සහභාගි වී නොමැති බව ජනාධිපති නීතිඥවරයා කොමිසමේ අවධානයට යොමු කළේ ය.

කෙසේ වෙතත් එම ප්‍රශ්නය විමසීම සම්බන්ධයෙන් දැඩි ලෙස ආවේගශීලි වු මන්ත්‍රීවරයා කොමිසම් සභාවේ විත්ති කුඩුවේ සිටම කාදිනල් හිමිපාණන් නියෝජනය කළ ජනාධිපති නීතිඥ ශමිල් පෙරේරා මහතාට එම ප්‍රශ්නය යොමු කිරීම සම්බන්ධයෙන් සිය විරෝධය පළ කරමින් දෝෂාරෝපනය කළේ ය.

මන්ත්‍රීවරයාගේ ආවේගශීලි හැසිරීමත් සමග කොමිසමේ සභාපති විනිසුරුවරයා මන්ත්‍රීවරයාට දැඩි ලෙස අවවාද කර සිටියේ, කොමිෂන් සභාව තුළ සාක්ෂිකරුවෙකු වන ඔබ නීතිඥවරයෙකුට අගෞරව වන ලෙස හැසිරීම කොමිසමට අගෞරව කිරීමක් සේ සලකන බවය.

Page 1 of 2