සංචාරක ශ්‍රී ලංකා කණ්ඩායම සහ ඔස්ට්‍රේලියා කණ්ඩායම අතර පැවැත්වෙන පන්දුවාර 20 ක්‍රිකට් තරගාවලියේ දෙවැනි තරගය මීට සුළු මොහොතකට පෙර ආරම්භ වූවා.
සිඩ්නි ජාත්‍යන්තර ක්‍රිකට් ක්‍රීඩාංගණයේ දී පැවැත්වෙන තරගයේ කාසියේ වාසිය දිනාගත්තේ ශ්‍රී ලංකා නායක දසුන් ශානක විසින්.
පළමු තරගයේ දී මෙන්ම ශානක තීරණය කළේ ප්‍රථමයෙන් පන්දු යැවීමට යි.
මෙම පුවත පළ කරන අවස්ථාවවන විට (පස්වරු 2.00) ඔස්ට්‍රේලියා කණ්ඩායම එක් කඩුල්ලක් දැවී ලකුණු 33ක් ලබා සිටිනවා.
නිමා වූයේ තරගයේ 04වැනි පන්දු වාරය යි.
පළමු කඩුල්ල ලෙස දැවී ගියේ පසුගිය තරගයේ ශ්‍රී ලංකාවට ප්‍රබල පීඩනයක් එල්ල කළ බෙන් මැක්ඩෙමෝට්ගේ කඩුල්ලයි.
නුවන් තුෂාර යැවූ පන්දුවකට ඔහු එල්ල කළ පහරක් මනරම් උඩපන්දුවක් ලෙසින් රැක ගත්තේ වනිඳු හසරංග විසින්.
අනෙක්පස රැඳී සිටින නායක ඒරන් ෆින්ච් ලකුණු 14ක් ලබා සිටිනවා.
පළමු තරගය
තරග 05කින් සමන්විත තරගාවලියෙහි පළමු තරගය ජයගත්තේ ඔස්ට්‍රේලියාව විසින්වන අතර ඒ අනුව ඔවුන් තරගාවලියේ ඉදිරියෙන් පසුවනවා.
එම තරගය තුළ ශ්‍රී ලංකා පන්දු යවන්නන් ඉතා උසස් දස්කම් දැක්වූ අතර ඔවුන් ප්‍රබල ඔස්ට්‍රේලියා පිතිකරුවන් ලකුණු 149කට සීමා කිරීමට සමත් වුණා.
කෙසේ වෙතත් පන්දු යවන්නන් ලබා දුන් ජයග්‍රාහී මාවත මකා දමන්නට සුපුරුදු ලෙස පිතිකරුවන්ගේ වගකීම් විරහිත ක්‍රීඩා විලාශය හේතු වූයේ අවාසනාවන්ත ලෙස යි.
ශ්‍රී ලංකාව තරගය පරාජය වූයේ ලකුණූ 20කින්.
බිනුරට කොවිඩ්
මේ අතර ශ්‍රී ලංකා කණ්ඩායම පිළිබඳ තවත් අවාසනාවන්ත පුවතක් වාර්තා වෙනවා.
ඒ, වේගපන්දු යවන ක්‍රීඩක බිනුර ප්‍රනාන්දු හට කොවිඩ් 19 ආසාදනය වී ඇති බවට හඳුණා ගැනීම යි.
පළමු තරගයේ දී බිනුර ප්‍රනාන්දු ඉතා හොඳින් පන්දු යැවීමෙහි නිරත වූ අතර එනිසාම ජාත්‍යන්තරයේ පවා ඔහු කතාබහට ලක් වූවා.
කොවිඩ් ආසාදිත බවට තහවුරු වීමත් සමග බිනුර හට තරගාවලියේ ඉතිරි තරග අහිමිවනු ඇති බවට යි මත පළව ඇත්තේ.
ශ්‍රී ලංකා කණ්ඩායමේ ක්‍රීඩකයින් අතර කොවිඩ් 19 වෛරසය පැතිර යාම දින ගණනාවක සිට නිරීක්ෂණයවන අතර කඩුළු රකින ක්‍රීඩක කුසල් මෙන්ඩිස් ද මේවන විට ආසාදිතව පසුවනවා.
එනිසා ඔහුට පළමු තරග දෙක අහිමිව තිබෙනවා.
මීට පෙර දසුන් ශානක, චාමික කරුණාරත්න සහ නුවන් තුෂාර ඇතුළු කිහිපදෙනෙකුටම කොවිඩ් වෛරසය ආසාදනය වූ අතර ඔවුන් මේවන විට සුවය ලබා සිටිනවා.
මේ අතර බිනුර ප්‍රනාන්දු වෙනුවට නුවන් තුෂාර කැඳවා තිබෙනවා.
තරගයේ ඉදිරි තොරතුරු සඳහා ඒෂියන් මිරර් සමගින් රැඳී සිටින්න…
