ආර්ථික ප්‍රවණතා සැලකිල්ලට ගනිමින් වාණිජ බැංකුවල පොලී අනුපාතය තීරණය වීමට බලපාන මහ බැංකුවේ ප්‍රතිපත්ති පොලී අනුපාතය මේ නොවැම්බර් මාසයේදී වෙනස් නොකිරීමට තීරණය කර තිබෙන බව ශ්‍රී ලංකා මහ බැංකුව සඳහන් කරයි.

මේ අනුව, මහ බැංකුවේ ප්‍රතිපත්ති පොලී අනුපාත නොවැම්බර් මාසයේදී සියයට 6.50 ක් සහ සියයට 8.00 ක් ලෙස තවදුරටත් පවත්වාගෙන යනු ඇති.

ගෙවුණු ඔක්තෝම්බර් මාසයේදී මෙරට උද්ධමනය සියයට 1.6 ක් දක්වා පහළ වැටුණු අතර සැප්තැම්බර් මාසයේදී උද්ධමනය සියයට 3.5 ක් විය. බැංකුව පවසා තිබෙන්නේ උද්ධමනය ඉදිරියේදී අඩු අගයක පවතිනු ඇතැයි උපකල්පනය කරන බවයි.

මේ වසරේ මුල් මාස 09 තුළදී රාජ්‍ය අංශය බැංකු වලින් ලබාගත් ශුද්ධ ණය රුපියල් බිලියන 87.3 කින් වැඩි වෙද්දී රාජ්‍ය සංස්ථා විසින් ලබාගත් ශුද්ධ ණය ප්‍රමාණය රුපියල් බිලියන 1.2 කින් අඩුවී තිබීම කැපී පෙනේ.

මේ අතර, මෙම කාලයේදී බැංකුවල ශුද්ධ විදේශ වත්කම් ප්‍රමාණයද රුපියල් බිලියන 225.9 කින් වර්ධනය වී ඇත.

මේ වනවිට, බැංකු පොලී අනුපාත අඩු මට්ටමක තිබෙන හෙයින් පුද්ගලික අංශය බැංකු වලින් ලබාගන්නා ණය වර්ධනය වී තිබේ.

මහ බැංකුව සඳහන් කර තිබෙන්නේ සැප්තැම්බර් මාසයේදී පුද්ගලික අංශය වාණිජ බැංකු වලින් ලබාගත් ණය ප්‍රමාණය රුපියල් බිලියන 52.3 කින් වර්ධනය වී තිබෙන බවයි.