ඇමති ධූර සංඛ්‍යාව වැඩි කිරීම පිළිබඳව අග්‍රාමාත්‍ය රනිල් වික්‍රමසිංහ මහතා පාර්ලිමේන්තුවට ගෙන ආ යෝජනාව කථානායක කරු ජයසූරිය මහතා විසින් පිළිගනු ලැබී ය.
පාර්ලිමේන්තුවේ වැඩිම ආසන සංඛ්‍යාවක්‌ ලබා ඇති එක්‌සත් ජාතික පක්‍ෂය විසින් ජාතික ආණ්‌ඩුවක්‌ පිහිටුවා ඇති බැවින් අමාත්‍ය මණ්‌ඩලයේ අමාත්‍යවරුන් සංඛ්‍යාව 48 ක්‌ නොඉක්‌මවිය යුතු බවත් අමාත්‍ය මණ්‌ඩලයේ සාමාජිකයන් නොවන අමාත්‍යවරුන්ගේ හා නියෝජ්‍ය අමාත්‍යවරුන්ගේ සංඛ්‍යාව 45 ක්‌ නොඉක්‌මවිය යුතු බවත් ශ්‍රී ලංකා ප්‍රජාතාන්ත්‍රික සමාජවාදී ජනරජයේ ආණ්‌ඩුක්‍රම ව්‍යවස්‌ථාවේ 46(4) ව්‍යවස්‌ථාවට අමතරව පාර්ලිමේන්තුව විසින් තීරණය කරනු ලබයි යන්න අගමැති රනිල් වික්‍රමසිංහ මහතා අද පෙරවරුවේ ඉදිරිපත් කරන යෝජනාවේ සඳහන් වේ.
දහනව වැනි ව්‍යවස්‌ථා සංශෝධනය 46(1) ව්‍යවස්‌ථාවේ (අ) සහ (ආ) යන වගන්තිවලට අනුව ජාතික ආණ්‌ඩුවක්‌ නොවන අවස්‌ථාවලදී කැබිනට්‌ ඇමැති ධුර සංඛ්‍යාව තිහ නොඉක්‌මවිය යුතුය. කැබිනට්‌ නොවන ඇමැතිවරුන් සහ නියෝජ්‍ය ඇමැතිවරුන්ගේ සංඛ්‍යාවේ එකතුව හතළිහ නොඉක්‌මවිය යුතුය. ඒ අනුව ඇමැති, නියෝජ්‍ය ඇමති සංඛ්‍යාව 70කි.
එහෙත් දහනව වැනි ව්‍යවස්‌ථා සංශෝධනය 46(4) වගන්තිය අනුව ජාතික ආණ්‌ඩුවකදී කැබිනට්‌ ඇමැතිධුර සංඛ්‍යාව සහ කැබිනට්‌ නොවන හා නියෝජ්‍ය ඇමැති ධුර සංඛ්‍යාව ඉහළ දැමිය හැක. ඒ සඳහා පාර්ලිමේන්තුවේ අනුමැතිය ලබාගත යුතුයි.
