October 20, 2020

රජය විසින් පාර්ලිමේන්තුවට ඉදිරිපත් කර තිබෙන ආණ්ඩුක්‍රම ව්‍යවස්ථාවේ 20 වන සංශෝධන පනත් කෙටුම්පතට පාර්ලිමේන්තු කාරක සභා අවස්ථාවේ දී සංශෝධන කිහිපයක් හඳුන්වා දීමට රජය තීරණය කර ඇතැයි නීතිපතිවරයා අද (29) ශ්‍රේෂ්ඨාධිකරණය හමුවේ ප්‍රකාශ කළේය.

විසිවන සංශෝධන පනත් කෙටුම්පත අභියෝගයට ලක් කරමින් ගොනුකර තිබෙන පෙත්සම් අද ශ්‍රේෂ්ඨාධිකරණය හමුවේ විභාගයට ගැනීම ආරම්භ වූ අවස්ථාවේ දී නීතිපති දප්පුල ද ලිවේරා මහතා මෙම දැනුම්දීම සිදු කර තිබේ.

මෙහි දී නීතිපතිවරයා අධිකරණයට දන්වා සිටියේ, කාරක සභා අවස්ථාවේ දී සිදුකිරීමට නියමිත සංශෝධන අඩංගු ලේඛනයක් මෝසමක් මාර්ගයෙන් දැනටමත් අධිකරණය හමුවේ ගොනු කර ඇති බවය.

අධිකරණය හමුවේ ගොනුකර තිබෙන අදාළ සංශෝධනය අඩංගු ලේඛනය තමන් වෙතට ලබාදෙන ලෙස පෙත්සම්කාර පාර්ශවය වෙනුවෙන් පෙනී සිටි නීතිඥවරුන් අධිකරණයෙන් ඉල්ලීමක් කළේය.

ඒ අනුව අදාළ සංශෝධන අඩංගු ලේඛනවල පිටපත් පෙත්සම්කාර පාර්ශවයේ නීතිඥවරුන් වෙත ද ලබාදීමට පියවර ගන්නා ලෙස අගවිනිසුරු ජයන්ත ජයසූරිය මහතා ප්‍රමුඛ පංච පුද්ගල විනිසුරු මඩුල්ල දැනුම් දුන්නේය.

අගවිනිසුරු ජයන්ත ජයසූරිය, බුවනෙක අලුවිහාරේ,  සිසිර ද ආබෲ, ප්‍රියන්ත ජයවර්ධන සහ විජිත් මළල්ගොඩ යන මහත්වරුන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඬුල්ල ඉදිරියේ පෙත්සම් විභාගය මේ වන විටත් පැවැත් වේ.

විසිවන සංශෝධන පනත් කෙටුම්පත අභියෝගයට ලක් කරමින් ගොනු කර තිබුණු පෙත්සම් සඳහා මැදිහත් වී කරුණු දැක්වීමට අවසර දෙන ලෙස ඉල්ලා ඇමතිවරුන් වන නිමල් සිරිපාල ද සිල්වා, ගාමිණි ලොකුගේ, මහාචාර්ය ජී.එල්.පීරිස්, නීතිඥ සාගර කාරියවසම්, පූජ්‍ය ඕමාරේ කස්සප, ඒම්.දයාරත්න, ඩබ්ලිව්.ඒ. ඩී.වීරතිලක, පී.ජී.බී.අබේරත්න යන අය විසින් අතරමැදි පෙත්සම් ඉදිරිපත් කර ඇත.

සමගි තරුණ බලවේගය නියෝජනය කරන රසික ජයකොඩි සහ නාගරික මන්ත්‍රීනි නීතිඥ ලිහිණි ප්‍රනාන්දු යෝජිත 20 වැනි ආණ්ඩුක්‍රම ව්‍යවස්ථා සංශෝධනයට එරෙහිව මූලික අයිතිවාසිකම් පෙත්සම් දෙකක් අද ගොනු කළහ.

යෝජිත සංශෝධනයේ ඇතුළත් කරුණු ගණනාවක් මගින් ශ්‍රී ලංකා ප්‍රජාතාන්ත්‍රික සමාජවාදී ජනරජයේ ආණ්ඩුක්‍රම ව්‍යවස්ථාවේ 03 සහ 04 වගන්ති උල්ලංඝණය කෙරෙන බවට ඔවුන් සිය පෙත්සම් හරහා අධිකරණයට කරුණු ඉදිරිපත් කොට තිබේ.

සමගි ජන බලවේගය වෙනුවෙන් එහි මහලේකම් රංජිත් මද්දුම බණ්ඩාර මහතා ඊයේ ශ්‍රේෂ්ඨාධිකාණයට මූලික අයිතිවාසිකම් පෙත්සමක් ගොනු කළ අතර ඊයේ දවස තුළ පමණක් පාර්ශව 6ක් 20වැනි සංශෝධනයට එරෙහිව මූලික අයිතිවාසිකම් පෙත්සම් ඉදිරිපත් කොට තිබිණි.

මේ වන විට පාර්ලිමේන්තුවේ සභාගත කර තිබෙන 20 වෙනි ආණ්ඩුක්‍රම ව්‍යවස්ථා සංශෝධන පනත් කෙටුම්පත හමුවේ ආණ්ඩු පක්ෂ මන්ත්‍රීවරු බහුතරයක් දැඩි අපහසුතාවයකට මුහුණ දී සිටින බව වාර්තා වේ.

20 වැනි ආණ්ඩුක්‍රම ව්‍යවස්ථා සංශෝධනයෙන් අග්‍රාමාත්‍ය බලතල ඉවත් කරනවාද? එසේත් නැත්නම් අග්‍රාමාත්‍යවරයාට ද සැලකිය යුතු බලතල ප්‍රමාණයක් ලැබෙන අයුරින් ඊට සංශෝධන එකතු කර මෙම පනත් කෙටුම්පත සම්මත කරනවාද? යන මත දෙකෙහි එම මන්ත්‍රීවරුන් පිරිස හිරවී සිටියි.

20 වන ආණ්ඩුකම ව්‍යවස්ථා සංශෝධනය ගෙන එනු ලබන්නේ දැනට තිබෙන 19 වන ආණ්ඩුකම ව්‍යවස්ථාව අහෝසි කිරීමේ තාවකාලික පදනමකින් බවත් ඉදිරියේදී නව ආණ්ඩුක්‍රම ව්‍යවස්ථාවක් සම්මත කරගන්නා බවටත් ආණ්ඩුවේ ප්‍රධානින් පැවසුවද නව ව්‍යවස්ථාවක් ගෙන ඒමට වසරකට වැඩි කාලයක් ගතවනු ඇති බව වාර්තා වේ.

20 ගෙන ඒමේදී 19 වන ආණ්ඩුක්‍රම ව්‍යවස්ථාව අහෝසි වී 18 වන ආණ්ඩුක්‍රම ව්‍යවස්ථාව බල ගැන්වෙන අතර ඉන් 19න් අග්‍රාමාත්‍යවරයාට හිමි වූ බලතල රැසක් ජනාධිපතිවරයා යටතට පත් වේ.

මේ නිසා විසි වෙනි ආණ්ඩුක්‍රම ව්‍යවස්ථා සංශෝධනයේ දී ජනපති හා අගමැති අතර බල තුලනයක් තිබිය යුතු බව එම මන්ත්‍රීවරුන්ගේ අදහස වේ.

අද (22) පාර්ලිමේන්තුවට ඉදිරිපත් කිරීමට නියමිත 20 වන ආණ්ඩුක්‍රම ව්‍යවස්ථා පනත් කෙටුම්පත ඉතා කෙටි කලකින් සම්මත කර ගැනීමෙන් පසු කැබිනට් මණ්ඩල සංශෝධනයක් අනිවාර්යයෙන්ම සිදු වන බව දේශපාලන ආරංචි මාර්ග පෙන්වා දෙයි.

20 වන සංශෝධනයෙන් කැබිනට් අමාත්‍ය ධුර සංඛ්‍යාවේ සීමාව ඉවත් වන බැවින් එය ප්‍රයෝජනයට ගෙන කලකිරීමෙන් සිටින ජේෂ්ඨ මන්ත්‍රීවරුන් කිහිපදෙනෙකුටත් සුළු ජාතික හා සුළු පක්ෂ නියෝජිතයන් නියෝජනය කරන මන්ත්‍රීවරුන් කිහිපදෙනෙකුට හා රාජ්‍ය අමාත්‍ය ධුර දරන කිහිපදෙනෙකුටත් කැබිනට් අමාත්‍ය ධුර ලබා දීම ආණ්ඩුවේ අරමුණ වී තිබේ.

ඒ අතරම වත්මන් කැබිනට් මණ්ඩලයේ සිටින එක් අයෙකුගේ හෝ දෙදෙනෙකුගේ විෂයන් සංශෝධනය කිරීමට ද ආණ්ඩුව බලාපොරොත්තුවෙන් සිටියි.

එසේ වෙනසක් සිදු වන අමාත්‍ය ධුර අතර වයෝවෘද්ධ සාමාජිකයෙකු අමාත්‍ය ධුරයක් දරන විෂය පථයක් ද ඇතුලත් බව දැනගන්නට තිබේ.

හිටපු ජනාධිපති මෛත්‍රීපාල සිරිසේන මහතාට කැබිනට් අමාත්‍ය ධූරයකට වඩා ඉහළ ධූරයක් ලබා දීම පිළිබඳව කිසිදු යෝජනාවක් 20 වැනි ආණ්ඩුක්‍රම සංශෝධන කෙටුම්පතේ නොමැති බැව් දැනගන්නට තිබේ.

20 වැනි ආණ්ඩුක්‍රම ව්‍යවස්ථා සංශෝධනය ගෙන එමෙන් 19 වැනි ආණ්ඩුක්‍රම ව්‍යවස්ථාව අහෝසි කොට යළි 18 වැනි ආණ්ඩුක්‍රම ව්‍යවස්ථාව සක්‍රීය කිරීම තාවකාලික පියවරක් බව ප්‍රකාශ කරන ආණ්ඩුව 1978 ‌ජේ.ආර් ජයවර්ධන මහතා හඳුන්වා දුන් 19 වතාවක් සංශෝධනය වූ වත්මන් ආණ්ඩුක්‍රම ව්‍යවස්ථාව වෙනුවට නව ව්‍යවස්ථාවක් සැකසීම සඳහා 09 දෙනෙක් ගෙන් යුත් විද්වත් කමිටුවක් පත් කර තිබේ.

හිටපු ජනපතිට ඉහළ තනතුරක් නිර්මාණය කිරීම එම ව්‍යවස්ථාවෙන් සිදුවන බව ප්‍රකාශ වූවද එම ව්‍යවස්ථාවට කිසිදු පුද්ගලයෙකු ඉලක්ක කොට යෝජනා ගෙන නොඑන බවට දැන්වීමක් මැතිවරණයට පෙර එනම් අගෝස්තු 02 වැනි දින පොදුජන පෙරමුණ පුවත්පත්වල පළ කර තිබුණි.

20 වැනි ආණ්ඩුක්‍රම ව්‍යවස්ථා සංශෝධනයෙන් පසු තව ආණ්ඩුක්‍රම ව්‍යවස්ථාවක් සැකසීමට වසරක පමණ කාලයක් යන බව ව්‍යවස්ථා සම්පාදකයින් ප්‍රකාශ කොට තිබේ. ඒ අතරම එවන් නව ව්‍යවස්ථාවක් නොඑන බව ප්‍රකාශ කරන පිරිස්ද ආණ්ඩුවේ සිටියි.

සමගි ජන බලවේගය නියෝජනය කරන ශ්‍රී ලංකා මුස්ලිම් කොංග්‍රස් මන්ත්‍රීවරුන්ට ඉතා කඩිනමින් ආණ්ඩුවට එක්වීමේ අවශ්‍යතාවයක් තිබෙන බව එම පක්ෂයේ වර්තමාන ක්‍රියාකාරීත්වය සහ ප්‍රකාශ තුළින් පැහැදිළි වෙයි.

මේ වන විට කොන්දේසි විරහිතව ඒක පාර්ශවිකව හෝ කඩිනමින් ආණ්ඩුවට එක්වීමේ අවශ්‍යතාවයක් ශ්‍රී ලංකා මුස්ලිම් කොංග්‍රසයට තිබෙන බවද පැහැදිළි වෙයි.

ශ්‍රී ලංකා මුස්ලිම් කොංග්‍රසයේ නියෝජ්‍ය නායක නසාර් අහමඩ් මහතා ද ආණ්ඩුවට එක්වීමේ අවශ්‍යතාවය පෙන්වා දී තිබේ.

20 වැනි ආණ්ඩුක්‍රම ව්‍යවස්ථා සංශෝධන කෙටුම්පත පාර්ලිමේන්තුවේ සම්මත කර ගැනීම සඳහා අවශ්‍ය 2/3ක පොදුජන පෙරමුණු ආණ්ඩුවට එහි සන්ධානගත පාර්ශව සමඟ තිබෙන මූත් 20ට එරෙහි පිරිස් ආණ්ඩුව තුළ තිබීම මත ආණ්ඩුව අස්ථාවර විය හැකි බව නසීර් අහමඩ් මහතා පෙන්වා දී තිබේ.

ශ්‍රී ලංකා මුස්ලිම් කොංග්‍රසයේ උත්තරීතර සභාව මීට ටික දිනකට පෙර රැස් වී මන්ත්‍රීවරුන් තනි තනිව නොව පක්ෂයක් ලෙස ආණ්ඩුවට එක්වීම පිළිබඳව එකඟතාවයකට පැමිණ තිබේ.

එහෙත් ආණ්ඩුවට එක්වීම සඳහා ශ්‍රී ලංකා මුස්ලිම් කොංග්‍රසයට තවමත් ආරාධනයක් නොලැබුණු බව මුස්ලිම් කොංග්‍රස් නායක රවුෆ් හකීම් මහතා ප්‍රකාශ කොට ඇත.

1989 සිටම එනම් අෂ්රෆ් මහතා නායකත්වය දරණ සමයේ සිටම කුමන පැත්තෙන් තරග කළද මැතිවරණය අවසානයේ පවතින රජයට එක්ව අමාත්‍ය ධූර හා වරප්‍රසාද ලබා ගැනීම පිළිබඳ ඉතිහාසයක් ශ්‍රී ලංකා මුස්ලිම් කොංග්‍රසයට තිබේ.

20 වන ආණ්ඩුක්‍රම ව්‍යවස්ථා සංශෝධනය පිළිබඳව සොයා බැලීම සඳහා පත්කළ කමිටු වාර්තාව අද (16) කැබිනට් මණ්ඩලයට ඉදිරිපත් කිරීමට නියමිතය.

20 වන ආණ්ඩුක්‍රම ව්‍යවස්ථා සංශෝධනය අධ්‍යයනය කිරීම සඳහා අග්‍රාමාත්‍ය මහින්ද රාජපක්ෂ මහතා විසින් පසුගිය දා අමාත්‍ය මහාචාර්ය ජී.එල්.පීරිස් මහතාගේ ප්‍රධානත්වයෙන් යුත් කමිටුවක් පත් කළේ ය.

ඊට පාර්ලිමේන්තුව නියෝජනය කරන කැබිනට් අමාත්‍යවරුන්, රාජ්‍ය අමාත්‍යවරුන් මෙන්ම පාර්ලිමේන්තු මන්ත්‍රීවරුන් නව දෙනෙකු ද ඇතුළත් වේ.

එම කමිටුව පසුගිය 14 වනදා රැස්වූ අතර එහිදී ගනු ලැබූ නිගමන ඇතුළත් වාර්තාව ඊයේ අග්‍රාමාත්‍ය මහින්ද රාජපක්ෂ මහතා වෙත භාර දී තිබුණි.

ඒ අනුව අදාළ නිගමනයන් අද රැස්වන කැබිනට් මණ්ඩලයට ඉදිරිපත් කිරීමට නියමිතය.

20 වැනි ආණ්ඩුක්‍රම ව්‍යවස්ථා සංශෝධනය සහ පොදුජන පෙරමුණේ රත්නපුර දිස්ත්‍රික් පාර්ලිමේන්තු මන්ත්‍රී ප්‍රේමලාල් ජයසේකර මහතා ගැන අධිකරණය දුන් තීන්දුව මුල්කොට ගෙන විපක්ෂය සහ එහි හිතවතුන් සමාජ ගත කරමින් තිබෙන අදහස්වලට ජනාධිපති ගෝඨාභය රාජපක්ෂ මහතා ඊයේ (10) පිළිතුරු දී තිබේ.

රාජ්‍ය අමාත්‍යවරුන් සමග ජනාධිපති කාර්යාලයේ පැවති රැස්වීමේදී විපක්ෂ චෝදනා ගැන සඳහන් කළ ජනාධිපතිවරයා ආණ්ඩුක්‍රම ව්‍යවස්ථාවේ 20 වැනි සංශෝධනයේ අරමුණ 19 වැනි සංශෝධනයෙන් පනවා ඇති බාධක ඉවත් කොට ඉදිරියට යාම බව පැවසීය.

“සියල්ල එකවර වෙනස් කරන්න බැහැ. ඊට විශාල කාලයක් ගත වෙනවා. විවිධ අදහස් ඉදිරිපත් කර තිබෙනවා. 19වැනි සංශෝධනයේ ඇතැම් ලක්ෂණ එසේම තබාගන්න අපට අවශ්‍යයි. මූලික අරමුණ ජනාධිපති ධුර කාලය නොවෙනස්ව පවත්වා ගනිමින් ඉදිරි වැඩ කරගෙන යාම” බව ජනාධිපතිවරයා පැහැදිලි කළේය.

ප්‍රේමලාල් ජයසේකර මන්ත්‍රීවරයා මුල්කොට ගෙන විපක්ෂය නඟන චෝදනා ගැන අවධානය යොමු කළ ජනාධිපති රාජපක්ෂ මහතා තමා හෝ අග්‍රාමාත්‍යවරයා හෝ අධිකරණ ක්‍රියාවලියට කිසිදු බලපෑමක් නොකළ බව අවධාරණය කළේය.

“බලපෑම් කරනවානම් කළ යුතුව තිබුණේ මහාධිකරණයට. එවැන්නක් කිසිවිටෙකත් සිදුවූයේ නැහැ. අධිකරණ තීන්දුව දුන් විනිසුරුවරයා පත්කළේ ව්‍යවස්ථා සභාව. එහි සිටියේ කරූ ජයසූරිය, සජිත් ප්‍රේමදාස, තලතා අතුකෝරාළ ඇතුළු පිරිසක්. විපක්ෂයට එක් තීන්දුවක් හොඳයි. අනෙක නරකයි” යනුවෙන් ජනාධිපතිවරයා පැවසීය.

අභියාචනාධිකරණ විනිසුරුවරයා පත් කළේ ද, එකී ව්‍යවස්ථා සභාවම බව පෙන්වා දුන් ජනාධිපතිවරයා විපක්ෂය අසත්‍යප්‍රචාරයක නිරතව සිටින බව වැඩිදුරටත් පැවසීය.

19 වැනි ආණ්ඩුක්‍රම ව්‍යවස්ථාව අහෝසි කරන්නේ නම් ජයවර්ධනපුර පාර්ලිමේන්තුව බුල්ඩෝසර කර විනාශ කරන ලෙස නලින් බණ්ඩාර මන්ත්‍රීවරයා කතානායක මහින්ද යාපා අබේවර්ධන මහතාගෙන් ඉල්ලීමක් කර තිබේ.

19 ආණ්ඩුක්‍රම ව්‍යවස්ථාව අහෝසි කිරීමෙන් ප්‍රජාතන්ත්‍රවාදය වලපල්ලට යන බැවින් තවදුරටත් පාර්ලිමේන්තුවක අවශ්‍යතාවයක් නොමැති බවද මන්ත්‍රීවරයා කතානායකවරයාට පෙන්වා දී තිබේ.

කුරුණෑගල දිස්ත්‍රික්කය නියෝජනය කරන සමගි ජනබලවේග මන්ත්‍රීවරයෙකු වන බණ්ඩාර මහතා කතානායකවරයා හමුවේ ප්‍රකාශ කොට තිබෙන්නේ පාර්ලිමේන්තුවට පුර්ණ බලතල ලබා දීමේ අරමුණින් සම්මත කරගත් ආණ්ඩුක්‍රම ව්‍යවස්ථාව අහෝසි කර 20 වැනි ආණ්ඩුක්‍රම ව්‍යවස්ථාව ගෙන එමෙන් පාර්ලිමේන්තුව සතු එම බලතල සියල්ලම විධායක ජනාධිපතිවරයාට හිමිවන බවයි.

20 වෙනි ආණ්ඩුක්‍රම ව්‍යවස්ථා සංශෝධන කෙටුම්පතට පාර්ලිමේන්තුවේ ඡන්දය විමසීමේ දී ඊට සහය දීමට සමගි ජන බල වේගයේ පිරිසක් ආණ්ඩුවට එක් කරගන්නා බව මහින්දානන්ද අලුත්ගමගේ අමාත්‍යවරයා ඊයේ (10) පාර්ලිමේන්තුවේ දී හෙළිදරව් කරන ලදී.

ඒත් ආණ්ඩුවේ සම කැබිනට් ප්‍රකාශකයෙකු වන උදය ගම්මන්පිල අමාත්‍යවරයා ඊයේ (10) පැවැති කැබිනට් මණ්ඩල තීරණ දැනුම් දීමේ අවස්ථාවේ දී සඳහන් කළේ 20 වැනි ආණ්ඩුක්‍රම ව්‍යවස්ථා සංශෝධනය සම්මත කර ගැනීමට විපක්ෂයේ මන්ත්‍රීවරුන් ආණ්ඩුවට එක් කරගැනීමේ අවශ්‍යතාවයක් නොමැති බවය.

20 වැනි ආණ්ඩුක්‍රම ව්‍යවස්ථා සංශෝධනයට කැමැත්ත පළ කිරීමට විපක්ෂයේ අයෙක් සිටි නම් ඔහුට විපක්ෂයේ සිටම සිය කැමැත්ත පළ කළ හැකි බව ගම්මන්පිල මහතා පෙන්වා දෙයි. ඒ සඳහා ආණ්ඩුවට එක්වීමේ අවශ්‍යතාවයක් නොමැති බවද සඳහන් කරයි.