October 20, 2020

නියමිත වට ප්‍රමාණයට අදාල මිලට වඩා වැඩි මිලට පොල් අලෙවි කල වෙළදුන් 56 දෙනෙකුට එරෙහිව ඊයේ (28) දිනයේ නීතිමය ක්‍රියාමාර්ග ගත් බව පාරිභෝගික කටයුතු අධිකාරිය ප්‍රකාශ කරයි.

එම අධිකාරියේ නිලධාරීන් දිවයින පුරා සිදු කළ වැටලීම්වලදී අදාළ වෙළඳුන් හඳුනාගෙන ඇති බව වාර්තා වේ.

කොළඹ, ගම්පහ ,පුත්තලම, කුරුණැගල, කෑගල්ල, රත්නපුර, මහනුවර, නුවරඑළිය , බදුල්ල, මොනරාගල, සහ මාතලේ යන දිස්ත්‍රික්කවල ඊයේ දිනයේ මෙම වැටලීම් සිදුකර ඇති බව අධිකාරිය පවසයි.

පාරිභෝගික කටයුතු අධිකාරිය විසින් පොල් ගෙඩියක් අලෙවි කළ හැකි උපරිම මිලක් දක්වමින් පසුගිය 25 වනදා ගැසට් නිවේදනයක් නිකුත් කර තිබුණි.

පාරිභෝගික සේවා අධිකාරිය විසින් ගැසට් නිවේදනයක් මගින් හඳුන්වා දී තිබෙන පොල් ගෙඩියේ වටේ ප්‍රමාණයට මිල නියම කිරීමේ නව මිනුම් ඒකකය මේ වන විට සමාජයේ හාස්‍යට ලක් ව තිබේ.

පොල් ගෙඩියේ වට ප්‍රමාණය මැනීම සඳහා කඩපිළට යනවිට ටේප් පටියක් රැගෙන යා යුතුදැයි පාරිභෝගිකයන් ප්‍රශ්න කරයි.

ඉකුත් 26 වනදා නිකුත් කර ඇති එම ගැසට් නිවේදනයෙන් පොල් ගෙඩියක් සඳහා පාලන මිලක් පනවා ඇති අතර එය උල්ලංඝනය කරන වෙළදුන්ට එරෙහිව නීතිමය පියවර ගැනීමට ද නියමිතය.

පළල අඟල් 12 ට අඩු පොල් ගෙඩියක් රුපියල් 60 ටත්, අගල් 12 - 13 අතර පොල් ගෙඩියක් රුපියල් 65 ටත්, අගල් 13 වැඩි පොල් ගෙඩියක් රුපියල් 70 ටත් අලෙවි කළ යුතු බව එම ගැසට් නිවේදනයෙන් දැනුම් දී තිබේ.

බොහෝ භාණ්ඩ මැනීමට රාත්තල්, කිලෝ, ග්‍රෑම් තිබෙන ආකාරයට පොල් ගෙඩිය මැනීමට වටප්‍රමාණ ඒකකයක් හඳුන්වා දුන් බව පාරිභෝගික සේවා අධිකාරිය තම නවතම සොයා ගැනීම පිළිබඳව කරුණු දක්වමින් පෙන්වා දී තිබේ.

මේවන විට දේශිය වෙළඳ පොලේ පොල් මිල ඉහළ යාම සම්බන්ධයෙන් පාරිභෝගිකයාට විශාල ගැටළුකාරී තත්ත්වයක් අත්විඳින්නට සිදුවී ඇත.

ඊට පිළියමක් ලෙස වැවිලි අමාත්‍ය වෛද්‍ය රමේෂ් පතිරණ මහතා විසින් විශේෂ සාකච්ඡාවක් ඊයේ(22) පොල් වගාකිරීමේ මණ්ඩලයේ සභාපති සහ පොල්, කිතුල්, තල් හා රබර් වගා ප්‍රවර්ධන ආශ්‍රිත කාර්මික භාණ්ඩ නිෂ්පාදන හා අපනයන විවිධාංගීකරණ රාජ්‍ය අමාත්‍ය අරුන්දික ප්‍රනාන්දු මහතා සමග සිදුකර තිබේ.   

එහිදී, අමාත්‍යවරයා විසින් ගත් ක්ෂණික ක්‍රියාමාර්ගයක් ලෙස පාරිභෝගිකයන් සඳහා සහන මිලට පොල් බෙදා හැරීමේ ව්‍යාපෘතියක් ලෙස හලාවත වැවිලි සමාගම, කුරුණෑගල වැවිලි සමාගම, පොල් වගා කිරීමේ මණ්ඩලය (කප්රුක) මගින් රුපියල් 60 ක සහන මිලට රට පුරා පොල් බෙදා හැරීමට තීරණය කෙරුණි.

මේ අනුව ඊයේ කොළඹ හා තදාසන්න ප්‍රදේශවල ලොරි රථ යොදාගෙන සහන මිලට පොල් බෙදා හැරීම ආරම්භ කෙරුණු අතර අද සිට  එලෙසම සහන මිලට පොල් බෙදා හැරීම සිදුකරන බව වැවිලි අමාත්‍යාංශය පවසයි.

මෙයින්  පාරිභෝගිකයින් සඳහා සහන මිලට පොල් මිලදී ගැනීමට හැකියාවක් ඇත.

නමුත් කොළඹින් පිටත දිවයින පුරා මෙම වැඩපිළිවෙල යටතේ සහන මිලට ජනතාවට පොල් ලබා දීමේ වැඩපිළිවෙලක් ක්‍රියාත්මක නොවන අතර ජනතාව පවසන්නේ සහන මිලට පොල් ලබා දීමේ වැඩපිළිවෙල කොළඹින් පිටත ගමට ගෙන ආ යුතු බවයි. 

පොල් සංවර්ධන මණ්ඩලය සමග එක්ව ජංගම අලෙවි රථ මගින් පොල් ගෙඩිය රුපියල් 70.00කට අද (18) සිට අලෙවි කරන බව වෙළෙඳ ඇමැති බන්දුල ගුණවර්ධන ප්‍රකාශ කළේය.

 ඇමැතිවරයා මේ බව පැවැසුවේ ඊයේ (17) හෝමාගමදීය.

අයහපත් කාලගුණය හේතුවෙන් පොල් නිෂ්පාදන විශාල ලෙස පහත වැටී ඇතැයි කී ඇමැතිවරයා ඒ හේතුවෙන් පොල් මිල තරමක් ඉහළ ගොස් ඇති බව කියයි.

‘රටේ බඩුමිල අඩු කරන්න ප්‍රාතිහාර්ය විසඳුම් නැහැ. වෙළෙඳ ඇමැතිවරයාත් ලෝකේ එක සත්වයෙක් පමණයි. මුළු ලෝකෙම වරායවල් වහනකොට ගුවන්තොටුපොළවල් වහනකොට ලංකාවේ බඩුමිල ඉහළ යනවා. බඩු මිල ඉහළ යනවා කියලා අනිත් රටවල්වල ගුවන්තොටුපොළවල් වරායවල් අරින්න ලංකාවේ වෙළෙඳ ඇමැතිට බැහැ.’ යැයි බන්දුල ගුණවර්ධන මහතා වැඩිදුරටත් කරුණු දක්වා සිටියේය.

මේවන විට ජනතාවට එලොව පොල් පෙනී ඇත. ඒ සීඝ්‍රයෙන් වෙළෙඳපොලේ පොල් මිල ඉහලයාම හේතුවෙනි. ඉතා කුඩා ප්‍රමාණයේ පොල් ගෙඩියක වෙළෙඳපොල මිල රුපියල් 80ට වැඩි මිලකට අලෙවි වේ. ව්‍යාපාරිකයින් පවසන්නේ පොල් ඵලදාව අඩුවීමෙන් වෙළෙඳ පොලට ලැබෙන පොල් ප්‍රමාණය අඩුවීමෙන් පොල් මිල ඉහල ගොස් ඇති බවයි.

මහ බැංකු වාර්තා අනුව සියයට 18කට ආසන්න ප්‍රතිශතයකින් පොල් ඵලදාව පහත වැටී ඇති අතර මෙලෙස පොල් පලදාව පහත වැටීමට හේතු කිහිපයක්ම බලපා ඇත. ඉන් එකක් වන්නේ වගා හානිවීම්ය. ඊට ප්‍රධාන වශයෙන් කෘමි උවදුර බලපා තිබේ. තවද වන අලින්, වදුරන් සහ දඩු ලේනුන් කරන වගා හානිය. එහෙත් මෙලෙස වෙළෙඳපොළට එන පොල් ඵලදාව අඩු වීමට මිනිසාගේ සෘජු මැදිහත්වීමෙන් සිදුකළ කටයුත්තක් ද බලපා ඇත. එනම් පොල් ඉඩම් කට්ටි කිරීම හෝ සම්පූර්ණයෙන් වගා රහිත තත්ත්වයකට පත් කිරීමය.

මිනිසාගේ කප්රුක ලෙස හඳුන්වන පොල් වගාවෙන් වසරකට සාමාන්‍යයෙන් හොඳ ඵලදාවක් ඇති ගසකින් ගෙඩි සියයක් පමණ ලබාගත හැකිය. අක්කරයක තිබිය යුතු පොල් ගස් ගණන 70කි. අක්කරයක ඉඩමකින් පොල් වගා සහිත බිම් කට්ටි කර විකිණීම මගින් වසරකට පොල් ගෙඩි 70000ක් පමණ මේ අනුව අහිමි වෙයි. පොල් කර්මාන්තකරුවන්ගේ සංවිධානය පවසන්නේ වසරකට පොල් ඉඩම් අක්කර 10000ක් පමණ කට්ටි කර විකුණන බවයි. එවිට දළ වශයෙන් අපට අහිමි වන ගෙඩි ගණන 7000,0000කි.

කෙසේ වෙතත් 2010 වසරේදී එවකට රජය විසින් පොල් ගස් කැපීම තහනම් කිරීමේ නීතියක් හඳුන්වා දුන්නේ පොල් වගා කිරීමේ මණ්ඩලයේ ලිඛිත අවසරයක් නොමැතිව පොල් ගස් කැපීම දඬුවම් ලැබිය හැකි වරදක් බව සඳහන් කරමිනි. එහෙත් 2010 වසරේ පැනවූ එම නීතිය කවුරුත් ගණනකට නොගත් බවක් පෙනෙන්නට නැත. ඒ තවමත් පොල් ඉඩම් කට්ටිකර විකිණීම හිතුමතේට සිදුවන බැවිනි. වසරින් වසර පොල් ඉඩම් කට්ටි කර විකිණීම 2010 වසරේදී 4000ත් 5000ත් වූ අතර මේ වනවිට අක්කර 10000ක් තරම් ප්‍රමාණයට ඉහළ ගොස් තිබේ. කෙසේ වෙතත් අනුමැතියකින් තොරව කැබලි කිරීමට අවසර ලබා දෙන අක්කර 10ක පොල් ඉඩම් උපරිම සීමාව අක්කර 5ක් දක්වා අඩු කිරීමට රජය පියවර ගෙන ඇත. පොල් ඉඩම් කැබලි කිරීම විශාල වශයෙන් සිදුවන බැවින් එම ඉඩම් කැබලි කිරීම පාලනය කිරීමේ අරමුණින් රජය විසින් මෙම පියවර ගෙන ඇත.

පොල් ඉඩම් කට්ටි කිරීමට අමතරව පොල් වගාවට දැඩි ලෙස හානි වන්නේ වන අලි, දඩු ලේනා, වදුරන්ගෙනි. මෙලෙස සතුන්ගෙන් වගාවට වන හානියේ බරපතලකම වන්නේ මෑතකදී එක් දිනකදී විශාල පොල් ඉඩමක පීදෙමින් තිබූ පොල් ගස් 1000ක් වන අලින් විසින් විනාශ කිරීමය. දඩු ලේනුන් සහ වදුරන් පොල් ගෙඩිවලට සිදුකරන හානිය විශාලය. ඊට ප්‍රධාන හේතුව වී ඇත්තේ කැලෑ කැපීම තුලින් එම වන සතුන් ගම් වැදීම සහ වගා ඉඩම්වලට පැමිණීමත් නිසාය. 

අද වන විට දඔුල්ල ආර්ථික මධ්‍යස්ථානයේ පොල් ගෙඩියක මිල රුපියල් 70ත් 100ත් අතර මිලකට අලෙවි වේ. මීගොඩ ආර්ථීක මධ්‍යස්ථානයේ පොල් ගෙඩියෙක මිල 50ත් 100ත් අතර වේ.

මෙරට වසරක ඒක පුද්ගල පොල් පරිභෝගනය පොල් ගෙඩි 109ක් පමණ වේ. එක් වසරකට පොල් ගෙඩි මිලියන 2000ක සංඛ්‍යාවක් අවශ්‍ය වේ. නමුත් මේ වනවිට වෙළෙඳපොළට අවශ්‍ය විදිහට පොල් ප්‍රමාණය ලබා දීමට නොහැකි වී තිබේ. මෙලෙස පොල් ඉඩම් කට්ටි කර විකිණීම හේතුවෙන් වෙන පොල් ගස්වල විනාශය නිසා වසරකට පොල් ගෙඩි 1000ක පමණ හිඟයක් මතුවී තිබේ. මේ වනවිට පොල් ඉඩම් හෙක්ටයාර් 21616 පමණ රටට අහිමි වී ඇතැයි වාර්තාවල දැක්වේ.

පොල් ඉඩම් කට්ටි කිරීමට අවශ්‍ය නීති රෙගුලාසි පැනවීම, පොල් වගාවට දැඩිව හානි සිදුකරන සතුන්ගෙන් එම වගාව ආරක්ෂා කිරීමේ වැඩපිළිවෙලක් සැකසීම, කෘමි උවදුර මැඩලීමට අවශ්‍ය සහය පොල් වගා කරුවන්ට ලබා දීමට බලධාරීන් ක්‍රියා කිරීම වැනි පොල් ඵලදාව ඉහල නැංවීමට අවශ්‍ය ක්‍රියාමාර්ග කඩිනමින් ගතහොත් අනාගතයේදී මෙරටට අවශ්‍ය පොල් ඉල්ලුම සපුරා ගත හැකිය.

දැනට වෙළපොලේ ඉහළ ගොස් ඇති පොල් ගෙඩියක මිල ගණන් නොවැම්බර් මාසය වන විට රුපියල් 100 දක්වා තවදුරටත් ඉහළ යා හැකි බව පොල් වගාකරුවන්ගේ සංගමය පවසයි.

මේ වනවිට වෙළඳපොලේ පොල් ගෙඩියක් අලෙවි වන්නේ රුපියල් 70 ත් 85 ත් අතර මිලකටය.

මසකට මිලියන 250 ක පමණ පොල් ගෙඩි ප්‍රමාණයක් ඵලදාවක් ලබන අතර, ඉන් මිලියන 150 ක්ම පරිභෝජනය සඳහා යොදා ගැනේ.

කෙසේ වෙතත්, පසුගිය කාලසීමාවේදී බලපෑ කාලගුණ තත්වයත් සමඟ පොල් ඵලදාව අඩුවී ඇති බව පොල් වගාකරුවන්ගේ සංගමය වැඩිදුරටත් පෙන්වා දෙයි.