March 28, 2024

මන්ත්‍රීවරු 30කගේ විශ්‍රාම වැටුප් අහිමිවෙයි

ඉකුත් පාර්ලිමේන්තුවට පළමුවරට පත්ව සිට මෙවර පත් නොවූ මන්ත්‍රීවරුන් 32කට පාර්ලිමේන්තු මන්ත්‍රී විශ්‍රාම වැටුප අහිමි වේ.

පාර්ලිමේන්තු මන්ත්‍රී විශ්‍රාම වැටුපට සුදුසුකම් ලැබීමට නම් ඔවුන් අඛණ්ඩව වසර පහක් පාර්ලිමේන්තුව නියෝජනය කළ යුතු අතර එම මන්ත්‍රීවරුන් පාර්ලිමේන්තු මන්ත්‍රීධූරයේ වසර පහක කාලයක් සම්පූර්ණ නොකිරීමය හේතුවෙන් ඔවුන්ට විශ්‍රාම වැටුප හිමි නොවේ.

පසුගිය පාර්ලිමේන්තු මැතිවරණයේදී ජනතා මනාපයෙන් හා ජාතික ලැයිස්තුවලින් නවක මන්ත්‍රීවරුන් රැසක් පාර්ලිමේන්තුවට තේරී පත් වූ අතර ඔවුන්ගේ මන්ත්‍රීධූරය වසර හතරයි මාස අටකට පමණ සීමා විය.

එක්සත් ජාතික පක්ෂය නියෝජනය කළ 23 දෙනෙකුගේත් දෙමළ ජාතික සන්ධානයේ මන්ත්‍රීවරුන් හතර දෙනෙකුගේ සහ ජවිපෙ එක් මන්ත්‍රීවරයෙකුගේ විශ්‍රාම වැටුප අහිමි වී තිබේ.

විශ්‍රාම වැටුප් අහිමි වන මන්ත්‍රීවරුන්ගෙන් වැඩිම ප්‍රමාණයක් එක්සත් ජාතික පක්ෂය නියෝජනය කළ මන්ත්‍රීවරුන් වෙයි.

ඒ අනුව එක්සත් ජාතික පක්ෂය නියෝජනය කළ මලික් සමරවික්‍රම, හිරුණිකා ප්‍රේමචන්ද්‍ර, චතුර සේනාරත්න, ආනන්ද අලුත්ගමගේ, බන්දුලාල් බණ්ඩාරිගොඩ, චන්දිම ගමගේ, කරුණාරත්න පරණවිතාන, දයා ගමගේ, ආශු මාරසිංහ, සමන් රත්නප්‍රිය, නඩරාජා තිලකේෂ්, එස්. වේලුකුමාර්, මොහොමඞ් මන්සුර්, සිසිර කුමාර, රහුමාන් ඉස්තාන්, නාලක කොලොන්නේ, තුසිතා විජේමාන්න, සන්දිත් සමරසිංහ , එම්. නවාවි, එම්. සල්මන්, ඒ. හෆිස් යන මන්ත්‍රීවරුන්ට පාර්ලිමේන්තු විශ්‍රාම වැටුප අහිමි වේ.

පාර්ලිමේන්තුව විසිරවීමට පෙර මන්ත්‍රීධූරයෙන් ඉල්ලා අස්වූ එක්සත් ජාතික පක්ෂ හිටපු පත්කළ මන්ත්‍රී ආචාර්ය ජයම්පති වික්‍රමරත්න මහතාට ද විශ්‍රාම වැටුප් අහිමි වේ.

සමඟි ජන බලවේගය නියෝජනය කළ මයන්ත දිසානායක මහතා මෙවර එම පක්ෂයේ ජාතික ලැයිස්තුව නියෝජනය කළ බැවින් ඔහු එයින් පාර්ලිමේන්තුවට පත්වුවහොත් විශ්‍රාම වැටුප අහිමි නොවනු ඇත.

එක්සත් ජනතා නිදහස් සන්ධානයේ හිටපු පාර්ලිමේන්තු මන්ත්‍රීවරුන් වන නිරෝෂාන් ප්‍රේමරත්න, මනෝජ් සිරිසේන හා ජාතික ලැයිස්තු මන්ත්‍රී මලිත් ජයතිලක යන මහත්වරුන් ද මෙවර පාර්ලිමේන්තුවට තේරී පත්නොවීම හේතුවෙන් විශ්‍රාම වැටුප අහිමිව ඇත.

ජනතා විමුක්ති පෙරමුණේ නලින්ද ජයතිස්ස මන්ත්‍රීවරයාට ද විශ්‍රාම වැටුප අහිමි වේ.

දෙමළ ජාතික සන්ධාන මන්ත්‍රීවරුන් වන්නේ ශාන්ති ශ්‍රී ස්කන්ධරාජා මහත්මිය සහ සිවප්‍රකාශම් සිවමෝහන්, කවීන්ද්‍රන් කෝඩීෂ්වරන්, ඊෂ්වරන් සරවනපවන් යන මහත්වරුන්ය.

Rate this item
(0 votes)